''மயில்சாமியின் பிள்ளைகளுக்கு சினிமா வாய்ப்பு... இப்படியொரு நிலையிலா வரணும்...'' - பிரபலங்கள் கண்ணீர் மல்க இரங்கல்

தமிழ் சினிமாவின் முக்கிய நகைச்சுவை நடிகர்களில் ஒருவரான மயில்சாமி இன்று அதிகாலை மாரடைப்பு காரணமாக மரணமடைந்தார். அவரது மரணத்துக்கு திரையுலகினர் மற்றும் அரசியல் தலைவர்கள் இரங்கல் தெரிவித்துவருகின்றனர்.

முதல்வர் ஸ்டாலின் தனது இரங்கல் செய்தியில், தொலைக்காட்சி விவாத நிகழ்ச்சிகளில் தமது கருத்துக்களை ஆழமாக பதிவு செய்யக்கூடியவர். திரையுலகில் தனக்கென ஒரு முத்திரையை பதித்த மயில்சாமியின் இழப்பு ஈடு செய்ய முடியாதது என்று குறிப்பிட்டுள்ளார்.

ஓ. பன்னீர்செல்வம் தனதுபதிவில், தமிழ்த் திரையுலகின் நகைச்சுவை மற்றும் குணச்சித்திர நடிகரும், பலகுரல் கலைஞரும் புரட்சித் தலைவர் எம்.ஜி.ஆர் அவர்களின் தீவிர ரசிகரும், அவரது புகழை அனைத்து மேடைகளிலும் உரக்கச் சொல்லிக்கொண்டிருந்தவருமான அன்புச் சகோதரர் மயில்சாமி திடீரென உடல்நலக்குறைவால் உயிரிழந்தார் என்ற செய்தி அறிந்து மிகுந்த வருத்தமுற்றேன். மக்களின் மனங்களில் நீங்கா இடம் பிடித்த அவரின் இழப்பு தமிழ் திரையுலகிற்கு பேரிழப்பாகும் என்று தெரிவித்துள்ளார்.

எடப்பாடி கே.பழனிசாமி, நடிகர், நிகழ்ச்சி தொகுப்பாளர், சமூக சேவகர் என பன்முகம் கொண்டவர் மயில்சாமி. எம்ஜிஆரின் தீவிர பற்றாளரான மயில்சாமி தீவிர இறை நம்பிக்கையும் கொண்டவர். மயில்சாமியை இழந்துவாடும் அவரது குடும்பத்தினருக்கு ஆழ்ந்த இரங்கல் என்று தெரிவித்துள்ளார்.

தெலங்கானா ஆளுநர் தமிழிசை, சமூக அக்கறை சார்ந்த கருத்துகளை தனது நடிப்பின் மூலம் மக்களிடம் எடுத்து சென்றவர் மயில்சாமி. கட்சி எல்லைகள் கடந்து நட்பு பாராட்டியவர். தனது பகுதி மக்களுக்கு சமூக சேவைகளை செய்தவர். அவரது மறைவு திரையுலகிற்கு மிகப்பெரிய பேரிழப்பு என்று பதிவிட்டுள்ளார்.

தேமுதிக தலைவர் விஜயகாந்த் தனது இரங்கல் பதிவில் மிமிக்கிரியால் ரசிகர்கள் மனதை கவர்ந்தவர். பழகுவதற்கு இனிமையானவர், அனைவருக்கும் உதவும் குணம் கொண்டவர் மயில்சமி. அவரது பிரிவால் வாடும் குடும்பத்தினர்க்கும் திரைக்கலைஞர்களுக்கும் எனது ஆழ்ந்த இரங்கல் என்று குறிப்பிட்டுள்ளார்.

நாம் தமிழர் கட்சியின் ஒருங்கிணைப்பாளர் சீமான், தனித்துவ நகைச்சுவை நடிப்பால் மக்களை மகிழ்வித்தவர் மயில்சாமி. வறியோர்க்கு உதவும் மனித நேய மாண்பாளர் மயில்சாமி மறைவு செய்தி அறிந்து வேதனை அடைந்தேன். மயில்சாமியை இழந்துவாடும் அவரது குடும்பத்தினருக்கு ஆழ்ந்த இரங்கல் என்று குறிப்பிட்டுள்ளார்.

நடிகர் கமல்ஹாசன் தனது ட்விட்டர் பக்கத்தில், நகைச்சுவை நடிப்பில் தனக்கென்று ஒரு பாணியை முன்னிறுத்தி வெற்றி கண்டவர் நண்பர் மயில்சாமி. உதவும் சிந்தையால் பலராலும் நினைக்கப்படுவார். அன்ப நண்பருக்கென் அஞ்சலி என்று பதிவிட்டுள்ளார்.

மத்திய இணையமைச்சர் எல். முருகன் தனது ட்விட்டர் பதிவில், நகைச்சுவை நடிகர் மயில்சாமி உடல்நலக்குறைவால் உயிரிழந்த செய்தி மிகுந்த மன வேதனையை அளிக்கிறது. தன்னை சுற்றியுள்ள பகுதிகளுக்கு, சமூக எண்ணத்தினால் பல சேவைகளை செய்து, தனது நகைச்சுவை நடிப்பின் மூலம் மக்களிடத்தில் நீங்கா இடம் பிடித்த அவரின் மறைவு திரையுலகுக்கு பேரிழப்பாகும் என்று பதிவிட்டுள்ளார்.

அமைச்சர் உதயநிதி ஸ்டாலின், அண்ணன் மயில்சாமியின் மறைவு மிகுந்த வேதனையளிக்கிறது. சிறந்த குணச்சித்திர நடிகர், எளிய மனிதர்கள் மீது பேரன்பு கொண்டவர். ரசிகர்களின் அன்பைப் பெற்ற அண்ணன் என்றென்றும் நினைவு கூறப்படுவார். அவரை இழந்து தவிக்கும் குடும்பத்தினருக்கு ஆதரவையும் ஆறுதலையும் தெரிவித்துக்கொள்கிறேன் என்று பதிவிட்டுள்ளார்.

இயக்குநர் பாரதிராஜா, நகைச்சுவையான நடிப்பால் அனைவரையும் மகிழ்வித்தவன். பாசத்துக்குரியவன் மயில்சாமி. உன் மறைவு தமிழ் திரை உலகிற்கு பேரிழப்பாகும். ஆழ்ந்த இரங்கல் என்று தெரிவித்துள்ளார்.

இயக்குநரும் நடிகருமான மனோபாலா, எம்ஜிஆர் அபிமானி, அவரை மாதிரி ஒரு வள்ளலை பார்க்க முடியாது. கொரோனா காலங்களில் தன்னை சுற்றியுள்ள மனிதர்கள் அனைவருக்கும் உதவி செய்தவர் என்று பேசினார்.

நடிகர் சார்லி தனது இரங்கல் பதிவில், தீவிர பக்தரான மயில்சாமி சிவராத்திரி அன்றே காலமாகிவிட்டார். அவரது மறைவு திரைத்துறைககு ஈடு செய்ய முடியாத இழப்பு என்று குறிப்பிட்டுள்ளார்.

இயக்குநரும் நடிகருமான பார்த்திபன், ஒரு மனிதன் நல்லவனாக வாழ வேண்டும் என்பதற்கு மயில்சாமி தான் உதாரணம். தான் மடடுமின்றி உடனிருந்தவர்களையும் மகிழ்ச்சியாக வைத்திருந்தவர். மயில்சாமியின் பிள்ளைகள் சினிமாவில் நடிப்பதற்கு வாய்ப்பு வழங்க வேண்டும் என்று குறிப்பிட்டுள்ளார்.

நடிகர் சரத்குமார் தனது ட்விட்டர் பக்கத்தில், எனது அன்பு நண்பரும் மிகச்சிறந்த மனிதரும் தமிழ் திரையுலகின் முன்னணி நகைச்சுவை நட்சத்திரமும் சிறந்த விரிவுரையாளருமான மயில்சாமி திடீர் உடல் நலக்குறைவால் மறைந்த செய்தி பேரதிர்ச்சியும், தீராத மன வேதனையும் அளிக்கிறது என்று குறிப்பிட்டுள்ளார்.

மயில்சாமியின் உடலுக்கு அஞ்சலி செலுத்திய பின் செய்தியாளர்களை சந்தித்த விஜய் சேதுபதி, பல முறை அவரது வீட்டிற்கு அழைத்திருக்கிறார். ஆனால் இப்படியொரு நிலையில் வரவேண்டியிருக்கும் என நினைக்கவில்லை என உருக்கமாக பேசியிருந்தார்.