நண்பேன்டா.. விஜய்க்கு பைக் ஓட்டும் அஜித் - பேனர்களால் தெறிக்கவிடும் புதுச்சேரி விஜய்-அஜித் பேன்ஸ்!

பொங்கல் பண்டிகையை ஒட்டி நடிகர்கள் விஜய் மற்றும் அஜித் படம் வெளியாவது முன்னிட்டு புதுச்சேரி முழுதும் பேனர்கள் களை கட்டியுள்ளன.

பொங்கல் பண்டிகைக்கு திரை விருந்தாக அஜித் நடித்துள்ள துணிவு, விஜய் நடித்துள்ள வாரிசு படங்கள் வெளியாகிறது. புதுச்சேரி நகர மற்றும் கிராமங்களில் உள்ள 16 திரையரங்கங்களும் இந்த இரண்டு படங்கள் மட்டுமே வெளியாகின்றன.

இதனை ஒட்டி நகரம் மற்றும் கிராமங்கள் முழுதும் அஜித் - விஜய் பேனர்களை ரசிகர்கள் வைத்து மகிழ்ந்து வருகின்றனர்.

நகரின் முக்கிய போக்குவரத்து சந்திப்புகளில் இரு நடிகர்களின் கட் அவுட்- பேனர்கள் பிரம்மாண்டமாக வைக்கப்பட்டுள்ளன.

இதில் உச்சகட்டமாக காமராஜ் சாலையில் "தல தளபதி" என குறிப்பிட்டு விஜய்க்கும் அஜித்துக்கும் ஒரே கட்அவுட் ரசிகர்கள் வைத்துள்ளனர்.

இதில் புல்லட்டை அஜித் ஓட்டுவது போலவும் பின்னால் விஜய் உட்கார்ந்து வருவது போலவும் உள்ளது.

இது அனைவரது கவனத்தையும் ஈர்த்து வருகிறது. புல்லட் நம்பர் பிளேட்டில் எண்களுக்கு பதிலாக "தல தளபதி' என குறிப்பிடப்பட்டுள்ளது.