நாகேஷை முன்வைத்து கமலை விமர்சித்த பாலசந்தர்

தமிழ் சினிமாவின் நகைச்சுவை நடிகர்களில் நாகேஷ் தவிர்க்க முடியாத ஆளுமை. பெரும்பாலான நடிகர்கள் தங்களின் கலை உச்சத்தில் இருந்து படிப்படியாக சரிந்து, ஒருகட்டத்தில் துக்கடா வேடங்களில் நடிக்கும் நிலைக்கு தள்ளப்படுவார்கள்.

நாகேஷுக்கு அந்த நிலை வரவில்லை. அவரை தீவிரமாக ரசித்த கமல் அதற்கு இடம் தராமல் பரீட்சார்த்தமான வேடங்களில் நாகேஷை நடிக்க வைத்தார்.

நாகேஷின் பூர்வீகம் கர்நாடகா. பிறப்பால் அவர் ஒரு கன்னடர். முழுப்பெயர் செய்யூர் கிருஷ்ண நாகேஸ்வரன். அப்பா கிருஷ்ணன் ராவ், அம்மா ருக்மணி அம்மாள். கர்நாடகாவில் உள்ள தாராபுரத்தில் பிறந்து வளர்ந்த நாகேஸ்வரன், சென்னையில் ரயில்வே கிளர்க்காக பணிபுரிந்தார்.

இவரது அறையில் தங்கியிருந்து சினிமாவுக்கு முயன்று கொண்டிருந்தவர்கள் வாலியும், நடிகர் ஸ்ரீகாந்தும். ஒரு அறையின் மூன்று நண்பர்களும் சினிமாவில் பிரபலமானது ஆச்சரியமான விஷயம்.

நாகேஷ் நடிக்க வந்த போது எம்ஜிஆரும், சிவாஜியும் உச்ச நட்சத்திரங்கள். சிவாஜி படங்களில் பணிபுரிகிறவர்கள் மீது எம்ஜிஆருக்கு ஒவ்வாமை இருந்தது. அவர்களை தன்னுடைய படத்தில் பெரும்பாலும் எம்ஜிஆர் பயன்படுத்துவதில்லை. நாகேஷ் மட்டும் இருவரது படங்களிலும் தொடர்ந்து நடித்தார்.

எம்ஜிஆர் படங்களின் வணிக வெற்றியின் ஓர் அங்கமாக கடைசிவரை நாகேஷ் திகழ்ந்தார். அத்தோடு சிவாஜியுடன் நடித்த திருவிளையாடல் தருமி வேடமும், தில்லான மோகனாம்பாள் படத்தின் சவடால் வைத்தி வேடமும் மறக்க முடியாதவை.

நாகேஷின் குணச்சித்திர நடிப்பை வெளிக்கொண்டு வந்தவர் பாலசந்தர். நாகேஷுக்குப் பிறகுதான் கமல் வருகிறார். படப்பிடிப்பில் பாலசந்தர் எதிர்பார்த்தது போல் கமல் நடிக்காமல் போனால், நாகேஷ் இருந்தா எப்படி நடிச்சிருப்பார் தெரியுமா என்று நாகேஷை முன்வைத்து கமலை திட்டுவாராம்  பாலசந்தர். இதனை கமலே கூறியுள்ளார்.

குருவையே அசத்திய நாகேஷை அப்போதிலிருந்தே உன்னிப்பாக கவனிக்க ஆரம்பித்தார் கமல். நகைச்சுவை நடிகராக மட்டும் இல்லாமல் நகேஷை பல்வேறு வேடங்களில் நடிக்க வைக்க வேண்டும் என்ற ஆசை கமலுக்கு இருந்தது.

அபூர்வ சகோதரர்கள் திரைப்படத்தில் நகேஷை கமல் வில்லனாக நடிக்க வைத்தார். அன்றைய ரசிகர்கள் பார்த்த நாகேஷின் முதல் வில்லன் நடிப்பு அதுதான். மைக்கேல் மதன காமராஜன் படத்தில் வரும் பிராடு மேனேஜர் கதாபாத்திரம்.

நம்மவரில் வரும் உணர்ச்சிகரமான வேடம் என பல்வேறு கதாபாத்திரங்களில் நாகேஷை நடிக்க வைத்த கமல், மகளிர் மட்டும் படத்தில் உயிரிழந்த பிணமாக நாகேஷுக்கு சவாலான வேடம் தந்தார். வசனம், முகபாவம், பாடிலாங்வேஜ்  எதுவும் இல்லை. ஆனாலும், நாகேஷ் பிணமாக வரும் காட்சிகளில் ஜனம் வாய்விட்டு சிரித்தது.

அந்த வேடத்தில் இம்ப்ரசான கமல், மகளிர் மட்டும் படத்தை இந்தியில் ரீமேக் செய்த போது நாகேஷ் நடித்த பிணம் கதாபாத்திரத்தில் தானே நடித்தார். உள்ளூர நாகேஷை வெற்றிக் கொள்ள வேண்டும் என்ற ஆரோக்யமான போட்டி கமலுக்கு இருந்திருக்கலாம்.

வெள்ளந்தித்தனமும், அசாதாரணமான பாடி லாங்வேஜும், வசன உச்சரிப்பும் ஒன்றிணைந்த தனித்துவமான நகைச்சுவை நாகேஷினுடையது. 1933, செப்டம்பர் 27 ஆம் நாள் பிறந்த நாகேஷுக்கு இன்று 89 வது பிறந்த நாள்.