15 வருடங்களை நிறைவு செய்யும் அஜித்தின் பில்லா

அஜித்தின் பில்லா 15 வருடங்களுக்கு முன், 2007 டிசம்பர் 14 ஆம் தேதி இதே நாளில் வெளியானது. தொடர் தோல்விகள், சுமார் வெற்றிகள் என நகர்ந்து கொண்டிருந்த அஜித்துக்கு ப்ளாக் பஸ்டர் ஹிட்டாக பில்லா அமைந்தது.

அஜித்தின் திரை மேனரிசத்தை உருவாக்கிய படங்களில் பில்லாவுக்கு முக்கிய இடம் உண்டு. பில்லாவின் நதிமூலம் சுவாரஸியமானது. திரைக்கதையாசிரியர்கள் சலீம் - ஜாவேத் இணைந்து சினம் கொண்ட இளைஞன் என்ற புதிய நாயக பிம்பப் பின்னணியில் பல கதைகளை எழுதினர். அதில் அமிதாப்பச்சன் நடித்தார். அவரை அந்தப் படங்கள் இந்தியின் சூப்பர் ஸ்டாராக ஆக்கியது.

1979 இல் ரஜினி வளர்ந்து வரும் நடிகர். ப்ரியா போன்ற ப்ளாக் பஸ்டர் ஹிட்கள் கொடுத்திருந்தாலும், முன்னணி நடிகராக நிலைபெறவில்லை. இந்த நேரத்தில் இந்திப் படங்களின் தமிழ் ரீமேக்குகளில் அவர் நடிக்க ஆரம்பித்தார். வினோத் கன்னா நடித்த டு யார் திரைப்படத்தை தமிழில் ரஜினியை வைத்து குப்பத்து ராஜா என்ற பெயரில் எடுத்தனர். படம் ஓடவில்லை.

அதே வருடம், சலீம் - ஜாவேத் கதை, திரைக்கதையில் அமிதாப்பச்சன் நடித்த மஜ்பூர் என்ற படத்தை தமிழில் நான் வாழவைப்பேன் என்ற பெயரில் எடுத்தனர். அதில் அமிதாப் நடித்த வேடத்தில் சிவாஜியும் நெகடிவ் வேடத்தில் ரஜினியும் நடித்தனர். படம் ஓரளவு நல்ல வெற்றியை பெற்றது.

இந்த நேரத்தில் பிரபல தயாரிப்பாளர் பாலாஜியின் மகன் சுரேஷ் பாலாஜி 1978 இல் சலீம் - ஜாவேத் எழுத்தில் அமிதாப்பச்சன் நடித்த டான் படத்தின் உரிமையை வாங்கி தமிழில் ரஜினியை வைத்து பில்லா என்ற பெயரில் ரீமேக் செய்தார். படம் மிகப்பெரிய வெற்றியை பெற்று, ரஜினியை பாக்ஸ் ஆபிஸ் டானாக்கியது. அதன் பிறகு சலீம் - ஜாவேத் எழுத்தில் அமிதாப் நடித்த இந்திப் படங்களின் தமிழ் தழுவலில் ரஜினி தொடர்ந்து நடிக்க ஆரம்பித்தார். அதற்கு வித்திட்டது பில்லா திரைப்படம்.

இப்படி ரஜினிக்கே திருப்புமுனையாக அமைந்த பில்லா படத்தை 2007 இல் விஷ்ணுவர்தன் அஜித்தை வைத்து ரீமேக் செய்தார். கதை நடக்கும் களத்தை தமிழ்நாட்டிலிருந்து மலேசியாவுக்கு மாற்றினார். அஜித்தின் ஸ்டைலிஷான லுக்கும், நடையும், யுவனின் இளையராஜா ரீமிக்ஸும் ரசிகர்களுக்கு பிடித்துப்போய் படம் ப்ளாக் பஸ்டர் ஹிட்டானது.

பூசினால்போல் இருந்த நயன்தாரா சிக்ஸ்பேக் வைத்து பில்லாவில் பிகினியில் தோன்றியது ரசிகர்கள் எதிர்பார்க்காத சர்ப்ரைஸ். நயன்தாரா பீல்ட் அவுட்டாகாமல் இன்றுவரை நிலைத்திருக்க, பில்லாவில் அவர் மேற்கொண்ட ட்ரான்ஸ்பர்மேஷன் முக்கிய காரணம்.

நயன்தாராவின் வேடத்துக்கு முதலில் ஸ்ரேயா சரணைதான் அணுகினார் விஷ்ணுவர்தன். அவர் ரஜினியின் சிவாஜியில் பிஸியாக இருந்ததால் நயன்தாராவை ஒப்பந்தம் செய்தார். இதற்கு நடுவில் த்ரிஷா, அசின், பூஜா என பலரையும் அவர் பரிசீலித்தார் என்பது முக்கியமானது.

பில்லாவின் அபார வெற்றிக்கு காரணமாக இருந்த இன்னொருவர் ஒளிப்பதிவாளர் நீரவ் ஷா. மெல்லிய நீல ஒளியில் அவர் ஒரு டான் உலகத்தை சிருஷ்டித்திருந்தார். 2007 இல் வெளியான படங்களில் அதிகம் வசூலித்த படங்களில் பில்லாவும் ஒன்று.

15 கோடியில் தயாரான படத்தை ஐங்கரன் நிறுவனம் 25 கோடிகளுக்கு வாங்கியது. சென்னையில் மட்டும் பில்லா 5.2 கோடிகளை வசூலித்தது. அதேபோல் சிங்கப்பூர், மலேசியா, யுஎஸ் உள்ளிட்ட வெளிநாடுகளிலும் படம் கலெக்ஷன் பொழிந்தது. குறிப்பாக 2007 இல் சிங்கப்பூரில் அதிகம் வசூலித்த முதல் 100 படங்களில் 3 படங்கள் மட்டுமே இந்தியப் படங்கள். சிவாஜி, பில்லா மற்றும் ஷாருக்கானின் இந்திப் படம் ஓம் சாந்தி ஓம்.

அஜித் நடிக்க வேண்டியதில்லை, நடந்தாலே போதும் என்ற எண்ணத்தை பில்லா தோற்றுவித்தது. பில்லா தந்த தெம்பால் இப்போதுவரை அஜித் நடந்து கொண்டேயிருக்கிறார்.