நம்பர் 1 - ஆனால் தமிழில் அல்ல... - மாஸ் காட்டும் துணிவு - கொண்டாடும் ரசிகர்கள்

பொங்கலை முன்னிட்டு கடந்த ஜனவரி 11 ஆம் தேதி வெளியான நடிகர் அஜித்தின் துணிவு ரசிகர்களிடையே நல்ல வரவேற்பைப் பெற்றது.

இதனையடுத்து துணிவு படம் கடந்த 8 ஆம் தேதி தமிழ் மட்டுமல்லாமல், தெலுங்கு, மலையாளம், கன்னடம், ஹிந்திஆகிய மொழிகளில்  நெட்ஃபிளிக்ஸ் ஓடிடி தளத்தில் வெளியாகியுள்ளது.

ஓடிடி வெளியீடுக்கு பிறகு இந்தப் படம் உலக அளவில் டிரெண்டானது. நெட்ஃபிளிக்ஸ் வெளியிட்டுள்ள  இந்தியாவில் அதிகம் பார்க்கப்பட்ட  டாப் 10 படங்களில் துணிவு ஹிந்தி பதிப்பு முதலிடத்தை பிடித்துள்ளது.

தமிழ் பதிப்பு 2 ஆம் இடத்திலும், துணிவு பட தெலுங்கு வெர்ஷனான தெகிம்பு 4 ஆம் இடத்திலும் உள்ளது. இது கடந்த பிப்ரவரி 6 ஆம் தேதி முதல் 12 ஆம் தேதி வரையிலான காலக்கட்டத்துக்கானது என்பது குறிப்பிடத்தக்கது.

தென்னிந்திய படங்களுக்கு ஹிந்தி ரசிகர்கள் காட்டும் ஆர்வமே இதற்கு காரணம் என்று கூறப்படுகிறது.

துணிவு படம் திரையரங்குகளில் வெளியான போது கலவையான விமர்சனங்களே கிடைத்த நிலையில் ஓடிடி வெளியீட்டுக்கு பிறகு இந்திய அளவில் படத்துக்கு கிடைத்த வரவேற்பு ரசிகர்களை ஆச்சரியப்பட வைத்துள்ளது.

இதன் காரணமாக அடுத்து உருவாகவிருக்கும் நடிகர் அஜித்தின் ஏகே 62 படத்தை பான் இந்தியா படமாக வெளியிட பெரும் வாய்ப்பு என ரசிகர்கள் பலரும் கருத்து தெரிவித்துவருகின்றனர்.