''என்னுடைய அந்தரங்க வீடியோ ரிலீஸ் ஆனதா சொன்னாங்க...'' - அதிர்ச்சி தகவலைப் பகிர்ந்த சீரியல் நடிகை ரேஷ்மா

எழில் இயக்கத்தில் விஷ்ணு விஷால், சூரி, நிக்கி கல்ராணி உள்ளிட்டோர் நடித்த வேலையினு வந்துட்டா வெள்ளைக்காரன் படத்தின் காமெடிகள் மிக பிரபலம். குறிப்பாக இந்தப் படத்தில் ரேஷ்மா நடித்திருந்த புஷ்பா கதாப்பாத்திரம் படம் வெளியான நேரத்தில் ரசிகர்களால் பேசப்பட்டது.

இதனைத் தொடர்ந்து கவர்ச்சிகரமான காமெடி கதாப்பாத்திரங்களில் நடித்துவந்தார் ரேஷ்மா. பின்னர் தமிழ் பிக்பாஸ் சீசன் 3 நிகழ்ச்சியினால் அவருக்கு புகழ் வெளிச்சம் கிடைத்தது.

பின்னர் விஜய் டிவியில் ஒளிபரப்பாகும் பாக்கியலட்சுமி சீரியல் அவரை தமிழ்நாட்டு இல்லங்களில் கொண்டு சேர்த்தது.

மேலும் தனது கவர்ச்சிகரமான படங்களை  இன்ஸ்டாகிராம் பக்கத்தில் பகிர்ந்து ரசிகர்களின் கவனத்தை ஈர்த்துவருகிறார்.

இந்த நிலையில் ஜி தமிழ் டிவியில் கரு.பழனியப்பன் தொகுத்து வழங்கும் தமிழா தமிழா நிகழ்ச்சியில் ரேஷ்மா கலந்துகொண்டு தனக்கு நேர்ந்த அதிர்ச்சிகர சம்பவத்தை பகிர்ந்துள்ளார். அவர் பேசிய வீடியோ சமூக வலைதளங்களில் வைரலானது.

வீடியோவில் ரேஷ்மா பேசியதாவது, என்னுடைய சகோதரி எனக்கு போன் செய்து என்னுடைய அந்தரங்க வீடியோ வெளியாகியுள்ளதாக சொன்னார். நான் அமெரிக்காவில் இருக்கிறேன். எனக்கு ஆளே இல்லையே என்றேன்.

முதலில் அந்த வீடியோவை எனக்கு அனுப்பி வை என்றேன். அந்த வீடியோவில் இருப்பது நான் இல்லை, மார்பிங் செய்ப்பட்டது என்று அவருக்கு புரிய வைத்தேன். என்னுடைய தந்தை தயாரிப்பாளர், சகோதரர் நடிகர். இதனால் அவர்கள் புரிந்துகொண்டார்கள்.

ஆனால் திரைப்பின்னணியில் இல்லாத எளிய பெண் ஒருவருக்கு இப்படி நடந்தால் அவர் கடுமையாக பாதிக்கப்பட்டிருப்பார். கடுமையான மன உளைச்சலுக்கு ஆளாகி, தற்கொலைவரை சென்றிருக்க கூடும் என்று அந்த விடியோவில் பேசியிருந்தார்.