தமிழில் முதல் படத்திலேயே ஆவியாக அறிமுகமான நடிகை மாதவி!

நடிகை மாதவி தமிழில் கமலின் 100 வது படமான ராஜபார்வையில் அறிமுகமானதாக பலரும் நினைத்துக் கொண்டிருக்கிறார்கள். அதற்கு ஒரு வருடம் முன்பே புதிய தோரணங்கள் படத்தில் மாதவியின் அறிமுகம் நடந்தது. கதாசிரியர் கலைஞானம் கதையெழுதி, தயாரித்த படம் இது.

மாதவி 1979 தெலுங்கில் வெளியான தூர்பு படமரா என்ற படத்தில் முதல்முறையாக அறிமுகமானார். அந்த நேரத்தில் தனது புதிய தோரணங்கள் படத்திற்கு நாயகி தேடிக் கொண்டிருந்த கலைஞானம், மாதவியின் பெரிய விழிகளால் கவரப்பட்டு அவரை தனது படத்தில் ஒப்பந்தம் செய்தார். இது நடந்தது 1980 இல்.

புதிய தோரணங்களில் சரத்பாபு நாயகனாகவும், மாதவி நாயகியாகவும் நடித்தனர். கௌபாய் படங்களில் சாகஸம் செய்து கொண்டிருந்த கர்ணன், ஆவி, பேய் கதையான புதிய தோரணங்களை இயக்கினார். அவருக்கு விருப்பமான குதிரை இந்தப் படம் நெடுக வந்ததால், கதை பிடித்துப் போய் இயக்கியிருக்கலாம்.

இதில் இன்னொரு சுவாரஸியமான விஷயம், கலைஞானம் புதிய தோரணங்கள் கதையுடன் முதலில் அணுகியவர் பாலுமகேந்திரா. அவரோ மலையாளத்தில் வெளியான 'ஏ' சான்றிதழ் பெற்ற படத்தை உரிமை வாங்கி தமிழில் எடுக்கலாம் என்று சொல்ல, கலைஞானம் பயந்து போய் கர்ணனை ஒப்பந்தம் செய்தார். அவரும் இயக்கம், ஒளிப்பதிவு இரண்டிலும் அடித்துக் கிளப்ப, படம் நன்றாக ஓடி லாபம் சம்பாதித்தது.

புதிய தோரணங்கள் படத்தில் மாதவி ஆவியாக வருவார். காதலில் தோல்வியடைந்த ஆவி. கதைப்படி இவர் திருமணங்களுக்கு குதிரையை வாடகைக்கு விடுகிறவர். ஆற்றுக்கு அந்தப் பக்கம் உள்ள கிராமமும், மாதவியின் கிரமமும் பகை கிராமங்கள். அந்தப் பகையை மறந்து ஆற்றங்கரைக்கு அந்தப்பக்கம் உள்ள, குதிரைக்கு லாடம் அடிக்கும் சரத்பாபுவை மாதவி காதலிப்பார். மாதவியின் ஊர் மைனர் இந்தத் திருமணத்தை எதிர்ப்பார். அதை பொருட்படுத்தாமல் மாதவி திருமணத்துக்கு தயாராவார்.

விடிந்தால் கல்யாணம். முதல்நாள் மைனர் மாதவியை கற்பழிக்க முயல்வான். தப்பித்து ஓடும் மாதவி ஒவ்வொரு வீட்டின் கதவாக தட்டுவார். மைனருக்கு அஞ்சி யாரும் கதவைத் திறக்க மாட்டார்கள். கடைசியில் மாதவி வேறு வழியின்றி மலையிலிருந்து குதித்து தற்கொலை செய்து கொள்வார்.

தன்னை மைனரிடமிருந்து பாதுகாக்காத கிராமத்தவரை பழிவாங்க, ஊரில் திருமண மேளச்சத்தம் கேட்டதும், இறந்து ஆவியான மாதவி தனது குதிரைக்குள் புகுந்து திருமண வீட்டை நாசமாக்கி திருமணமே நடக்கவிடாமல் செய்வார். இந்தப் பேய்க் குதிரையை சமாளிக்க முடியாமல் கிராமமே அங்கிருந்து வெளியேறும். மாதவியின் காதலர் சரத்பாபு அவர்களை தடுத்து ஆவியாக இருக்கும் காதலியை எப்படி சமாதானப்படுத்துகிறார் என்பது கதை.

சங்கர் கணேஷ் இசையில் கங்கை அமரன், கலை ஞானம் எழுதிய பாடல்கள் நல்ல வரவேற்பை பெற்றன. முதல் படத்திலேயே தனது வாளிப்பான தோற்றத்தாலும், அழகிய பெரிய விழிகளாலும் ரசிகர்கள் மனதில் பதிந்து போனார் மாதவி. அதற்கு அடுத்த வருடம் கமல் ஜோடியாக ராஜபார்வை படத்தில் நடிக்க, அவரது மார்க்கெட் உச்சிக்குப் போனது. இன்றுவரை நீச்சல் உடையில் மாதவி அடிக்க இன்னொரு நடிகை வரவில்லை எனலாம்.

1996 இல் திருமணம் செய்து கொண்ட மாதவி தற்போது கணவர், மூன்று மகள்களுடன் யுஎஸ்ஸில் வசித்து வருகிறார்.