டைகர் ஷெராஃப் படத்தின் மூலம் இந்தியில் அறிமுகமாகும் ரகுமான்-படங்கள்

சினிமா உலகம் வெறும் நாயகர்களால் மட்டுமே முன்னகர்வதில்லை. திறமையான குணச்சித்திர நடிகர்கள் சினிமாவின் முதுகெலும்பாக இருக்கிறார்கள். தமிழ், மலையாளத்தில் அப்படியான நடிகர்களில் ஒருவர் ரகுமான்.

டைகர் ஷெராஃபின் படத்தின் மூலம் முதல் முதல்முறையாக ரகுமான் இந்திக்கு சென்றிருக்கிறார்.

ஆரண்ய காண்டம் உள்ளிட்ட படங்களில் நடித்த ஜாக்கி ஷெராஃபின் மகன் டைகர் ஷெராஃப்.

கட்டுமஸ்தான் உடம்பும், மார்ஷியல் ஆர்டும் டைகர் ஷெராஃப்பை இந்தியின் இளம் முன்னணி நடிகராக்கியிருக்கிறது. அவரது நடிப்பில் தயாராகி வரும் படம் கனபத். வழக்கமான சர்வதேச சண்டைப் படம். இதில் டைகர் ஷெராஃபின் தந்தை வேடத்தில் ரகுமான் நடித்துள்ளார்.

அவர் சம்பந்தப்பட்ட காட்சிகள் யுகேயில் படமாக்கப்பட்டுள்ளன. அவரது காட்சிகள் அனைத்தும் எடுத்து முடிக்கப்பட்டு விட்டதாக படக்குழு தெரிவிக்கிறது.

இந்த வேடத்தில் நடிக்க முதலில் அணுகியது அமிதாப்பச்சனை என்கிறார்கள். பிறகு டைகர் ஷெராஃபின் தந்தை ஜாக்கி ஷெராஃபை நடிக்க வைப்பது என தீர்மானித்திருக்கிறார்கள். பிறகு அதுவும் ஒத்துவராமல் இறுதியில் ரகுமானை ஒப்பந்தம் செய்துள்ளனர்.

கனபத் படத்தை அறிமுக இயக்குனர் விகாஸ் பால் இயக்கியுள்ளார். கீர்த்தி சானான் நாயகி. குட் கோ புரொடக்ஷன் மற்றும் பூஜா என்டர்டெயின்மெண்ட் இணைந்து படத்தை தயாரித்துள்ளன.இந்த மாதம் 23 ஆம் தேதி படம் திரையரங்குகளில் வெளியாகிறது.