Raghava Lawrence: யாரும் இனி என் அறக்கட்டளைக்கு நன்கொடை அளிக்க வேண்டாம் - ராகவா லாரன்ஸ் அதிரடி

நடிகர் ராகவா லாரன்ஸ் தனது அறக்கட்டளைக்கு யாரும் நன்கொடை வழங்க வேண்டாமென தெரிவித்துள்ளார்.

நடன இயக்குநர், நடிகர், இயக்குநர் என பன்முகத் திறமை கொண்டவர் ராகவா லாரன்ஸ்.

தற்போது ருத்ரன், அதிகாரம், சந்திரமுகி 2, துர்கா ஆகியப் படங்களில் நடித்து வருகிறார்.

சந்திரமுகி 2-வின் முதல் ஷெட்யூல் மைசூரில் முடிந்துள்ளது. படத்தின் முதல் பாகத்தில் காமெடியில் கலக்கிய வடிவேலு இதிலும் நடிக்கிறார்.

இந்நிலையில் தற்போது வேண்டுகோள் ஒன்றை விடுத்திருக்கிறார் ராகவா லாரன்ஸ்.

அதில், “இத்தனை ஆண்டுகளாக என்னுடைய அறக்கட்டளைக்கு நன்கொடை வழங்கிய நன்கொடையாளர்கள் அனைவருக்கும் நன்றி தெரிவிக்க விரும்புகிறேன்.

நீங்கள் அனைவரும் எனக்கு ஆதரவாக நின்று உங்கள் நன்கொடைகளால் எனது சேவைக்கு ஆதரவளித்தீர்கள். என்னால் இயன்றதைச் செய்துள்ளேன், தேவைப்படும் போதெல்லாம் உங்களிடமிருந்து உதவியைப் பெற்றுள்ளேன்.

இப்போது ​​நான் நல்ல இடத்தில் இருக்கிறேன். பல திரைப்படங்களில் நடிப்பதற்கு ஒப்பந்தமாகி வருகிறேன். இனி மக்களுக்குச் சேவை செய்யும் முழுப் பொறுப்பையும் நானே ஏற்க முடிவு செய்துள்ளேன்.

எனவே, என் அறக்கட்டளைக்கு இனி உங்கள் பணத்தை நன்கொடையாக வழங்க வேண்டாம் என்று கேட்டுக்கொள்கிறேன்” என்று குறிப்பிட்டுள்ளார்.