கடைசியாக போன சிவன் கோயில்... கருவறையில் மயில்சாமியின் உருவப்படம் வைத்து வழிபாடு!

நடிகர் மயில்சாமியின் உருவப்படம் மேகநாதீஸ்வரர் கோயில் கருவறையில் வைத்து வழிபாடு செய்யப்பட்டுள்ளது.

தமிழ் சினிமாவில் பல மறக்க முடியாத காமெடி காட்சிகளில் நடித்திருப்பவர் நடிகர் மயில்சாமி.

மிமிக்ரி கலைஞரான இவர், வடிவேலு, விவேக் போன்ற காமெடி ஜாம்பவான்களுடன் இணைந்து தனித்துவமான பல நகைச்சுவை காட்சிகளில் நடித்துள்ளார்.

நடிப்பு மட்டுமல்லாமல் ஏழை - எளியோருக்கு உதவிகள் செய்து மக்களிடத்தில் நற்பெயரைப் பெற்றார் மயில்சாமி.

மாணவர்களின் படிப்பு செலவு, மருத்துவ செலவு என முக்கியமான எந்த உதவிகள் கேட்டாலும் மறுக்காமல் செய்பவர்.

ஆன்மிகத்தில் நாட்டம் மிகுந்த மயில்சாமி தீவிர சிவ பக்தரும் கூட.

இந்நிலையில் கடந்த 18-ம் தேதி இரவு சிவராத்திரியை முன்னிட்டு கேளம்பாக்கத்தில் உள்ள மேகநாதீஸ்வரர் கோயில் நிகழ்ச்சியில் அதிகாலை வரை கலந்துக் கொண்டார்.

பின்னர் அதிகாலை வீடு திரும்பிய மயில்சாமி, மாரடைப்பால் மரணமடைந்தார். இது ரசிகர்களையும், திரையுலகினரையும் அதிர்ச்சிக்குள் ஆழ்த்தியது.

மயில்சாமியின் இறுதிச்சடங்கில் ரஜினிகாந்த் உள்ளிட்ட திரையுலகினரும், ரசிகர்களும் கலந்துக் கொண்டு தங்களது அஞ்சலியை செலுத்தினர்.

தற்போது, மயில்சாமி இறுதியாக சென்று வந்த மேகநாதீஸ்வரர் கோயில் கருவறையில் அவரின் உருவப்படம் வைத்து வழிபாடு செய்யப்பட்டுள்ளது. அந்தப் படம் சமூக வலைதளங்களில் வைரலாகி வருகிறது.