1980 முதல் 2007 வரை... ஏவிஎம் நிறுவனமும், ரஜினியும் இணைந்து செய்த சாதனைகள்!

கமல், இணைந்து நடித்துக் கொண்டிருந்த நேரம், அவர்கள் இருவரையும் வைத்து தனக்கொரு படம் செய்துத்தர வேண்டும் என எஸ்.பி.முத்துராமனை ஏவி மெய்யப்ப செட்டியார் கேட்டுக் கொண்டார். எஸ்.பி.முத்துராமன் இவர்கள் இருவரையும் வைத்து எடுத்திருந்த ஆடுபுலி ஆட்டம் படம் அப்போது வெளியாகி நல்ல வரவேற்பைப் பெற்றிருந்தது.

ஏவி மெய்யப்ப செட்டியாரின் விருப்பத்தைக் கேட்டதும் ஏவிஎம் பேனரில் நடிக்க உடனே ரஜினி சம்மதித்தார். இனி ரஜனியும் நானும் இணைந்து நடிக்க வேண்டாம் என்று முடிவு செய்திருப்பதால், ரஜினியை வைத்து தனியாக படம் தயாரிக்கட்டும். நானும் தனியாக கால்ஷீட் தருகிறேன் என்றார் கமல். இந்த நேரத்தில் மெய்யப்ப செட்டியார் மரணமடைய, திட்டம் தள்ளிப் போனது.

ஏவி மெய்யப்ப செட்டியாரின் ஆசையை நிறைவேற்றும்விதமாக 1980 இல் ரஜினியை வைத்து முரட்டுக்காளை படத்தை எடுத்தனர். படம் மாபெரும் வெற்றியை பெற்றது. இதனைத் தொடர்ந்து தொடர்ச்சியாக பல படங்கள் ஏவிஎம் ரஜினியை வைத்து எடுத்தது. இந்தப் படங்கள் அனைத்தும் 100 நாள்கள் ஓடி வெற்றிப் பெற்றன.

1. முரட்டுக்காளை (1980 - எஸ்.பி.முத்துராமன்): தலையில் விக் வைத்து கிராமத்தான் தோற்றத்தில ரஜினி நடித்த இந்தப் படத்தில் ஹீரோவாக நடித்து வந்த ஜெய்சங்கர் முதல்முறை வில்லனாக நடித்தார். படம் 100 நாள்களைத் தாண்டி ஓடி வெற்றி பெற்றது.

2. போக்கிரி ராஜா (1982 - எஸ்.பி.முத்துராமன்): முரட்டுக்காளை வெற்றியைத் தொடர்ந்து அதே எஸ்.பி.முத்துராமன் இயக்கத்தில் தெலுங்கில் கிருஷ்ணா நடித்த சுட்டலுன்னாரு ஜhக்ரதா படத்தை போக்கிரி ராஜா என்ற பெயரில் ரீமேக் செய்தனர். ஏவிஎம் - ரஜினி காம்போவின் இரண்டாவது படமான இது 100 நாள்கள் ஓடியது.

3. பாயும் புலி (1983 - எஸ்.பி.முத்துராமன்): போக்கிரி ராஜா வெளியானதற்கு அடுத்த வருடம் அதே எஸ்.பி.முத்துராமன் இயக்கத்தில் ரஜினியை வைத்து பாயும் புலி படத்தை ஏவிஎம் தயாரித்தது. தி தர்ட்டி சிக்ஸ்த் சேம்பர் ஆஃப் ஷாவோலின் படத்தின் இன்ஸ்பிரேஷனில் இதன் கதை, திரைக்கதையை பஞ்சு அருணாச்சலம் எழுதினார். படம் 100 நாள்களைக் கடந்து ஓடியது.

4. நல்லவனுக்கு நல்லவன் (1984 - எஸ்.பி.முத்துராமன்): 1984 இல் அதே எஸ்.பி.முத்துராமன் இயக்கத்தில் தெலுங்குப் படம் தர்மாத்துடுவை விசுவின் திரைக்கதையில் நல்லவனுக்கு நல்லவனாக எடுத்தனர். படம் 100 நாள்களை கடந்து ஓடி வெற்றி பெற்றது.

5. மிஸ்டர் பாரத் (1986 - எஸ்.பி.முத்துராமன்): இந்தியில் யாஷ் சோப்ரா இயக்கிய வெற்றிப் படம் த்ரிசூலை விசு தமிழுக்கேற்ப திரைக்கதை அமைத்துத் தர, ஏவிஎம் தயாரிப்பில் ரஜினியை வைத்து எஸ்.பி.முத்துராமன் மிஸ்டர் பாரத் என்ற பெயரில் இயக்கினார். படம் 100 நாள்களை கடந்து ஓடி வெற்றி பெற்றது.

6. மனிதன் (1987 - எஸ்.பி.முத்துராமன்): வி.சி.குகநாதன் எழுதிய கதைக்கு, பஞ்சு அருணாசலம் திரைக்கதை எழுத, ஏவிஎம் தயாரிப்பில் எஸ்.பி.முத்துராமன் ரஜினியை வைத்து மனிதன் படத்தை எடுத்தார். படம் வெளியாகி 175 நாள்கள் ஓடி வெள்ளி விழா கண்டது.

7. ராஜா சின்ன ரோஜா (1989 - எஸ்.பி.முத்துராமன்): ரஜினியை வைத்து ஒரே மாதிரி படங்கள் எடுத்ததால் சற்று மாறுபட்டு இருக்கட்டும் என்று குழந்தைகளை மையப்படுத்தி, தி சவுண்ட் ஆஃப் மியூஸிக் பாதிப்பில் ராஜா சி;ன ரோஜா படத்தை எடுத்தனர். படம் 100 நாள்களை கடந்து ஓடி வெற்றி பெற்றது.

8. எஜமான் (1991 - ஆர்.வி.உதயகுமார்): கிழக்கு வாசல், சின்னக் கவுண்டர் வெற்றிப் படங்களை தந்த ஆர்.வி.உதயகுமார் இயக்கத்தில் ரஜினியை வைத்து 1993 இல் எஜமான் படத்தை ஏவிஎம் தயாரித்தது. படம் 175 நாள்களை கடந்து ஓடி வெற்றி பெற்றது.

9. சிவாஜி - தி பாஸ் (2007 - ஷங்கர்): நீண்ட இடைவெளிக்குப் பிறகு ஷங்கர் இயக்கத்தில் ரஜினியை வைத்து சிவாஜி படத்தை ஏவிஎம் தயாரித்தது. படம் 175 நாள்களை கடந்து ஓடி மாபெரும் வெற்றியை பெற்றது. ஒரு தயாரிப்பு நிறுவனத்தில், ஒரு நடிகர் நடித்த அனைத்துப் படங்களும் 100 நாள்களை கடந்து ஓடியது அரிய சாதனை. ஏவிஎம் - ரஜினி காம்போ இணைந்த 9 படங்களும் 100 நாள்களுக்கு மேல் ஓடி சாதனை படைத்தன. அதனை இதுவரை யாரும் முறியடிக்கவில்லை.