ரஜினியின் படத்தை முந்திய கமல் படம்.. 38 வருடங்களுக்கு முன் புத்தாண்டில் நடந்த பரபர போட்டி!

கமல் - போட்டி எழுபதுகளின் இறுதியில் தொடங்கி இன்றுவரை நீடித்து வருகிறது. ரஜினி கமர்ஷியல் படங்களில் தொடர்ச்சியாக நடித்து, தன்னை வசூல் சக்ரவர்த்தியாகவும், சூப்பர் ஸ்டாராகவும் நிலைநிறுத்திக் கொண்டார். கமர்ஷியல் படங்களுடன் பரிசோதனை முயற்சிகள் செய்து மாஸ் மற்றும் கிளாஸ் படங்களின் நாயகனாக கமல் தன்னை அடையாளப்படுத்திக் கொண்டார். இவர்களின் படங்கள் ஒரேநாளில் வெளியாகும் போது ரசிகர்களின் போட்டியால் திரையரங்குகள் தீப்பிடிக்கும்.

1985 இல் தமிழ்ப் புத்தாண்டை முன்னிட்டு ஏப்ரல் 11 கமல் நடித்த காக்கி சட்டை திரைப்படம் வெளியானது. போலீஸ் அதிகாரியாவதை தனது கனவாகக் கொண்டு, அதற்காக முயற்சி செய்துவரும் இளைஞனாக கமல் நடித்தார். அவரது ஜோடி அம்பிகா. சட்டையில்லாமல் உடற்பயிற்சி செய்யும் கமலை அம்பிகா 'சைட்' அடிப்பது இளமை ததும்பும் காட்சிகள். இளையராஜா அசத்தலான பாடல்களை காக்கி சட்டை படத்துக்குப் போட்டிருந்தார். கமலும், அம்பிகாவும் நடனத்தில் அசத்தியிருந்தனர். வில்லனாக நடித்த சத்யராஜ் தகடு தகடு என்று வசனம் பேசி கைத்தட்டல்களை அள்ளினார்.

ராஜசேகர் இயக்கிய, சத்யா மூவிஸின் காக்கி சட்டை வெளியான அடுத்த நாள் ஏப்ரல் 12 பாலசந்தரின் கல்யாண அகதிகள், ரங்கராஜ் இயக்கத்தில் மோகன், ரேவதி, லட்சுமி நடித்த உதயகீதம், எஸ்.ஏ.சந்திரசேகர் இயக்கத்தில் ரஜினி, அம்பிகா, சத்யராஜ், பாக்யராஜ் நடித்த நான் சிகப்பு மனிதன் ஆகிய படங்கள் வெளியாகின.

காக்கி சட்டை படத்தில் நடித்த அதே நாயகி, அதே வில்லன் ரஜினியின் நான் சிகப்பு மனிதன் படத்தில் நடித்தனர். அதே இளையராஜா இசை. கூடுதலாக பாக்யராஜும் உண்டு. நான் சிகப்பு மனிதனின் கதை ஆஜ் கி அவாஸ் இந்திப் படத்தைத் தழுவி எழுதப்பட்டது. கிரிமினல்களால் தங்கையையும், குடும்பத்தையும் இழந்த பேராசிரியராக ரஜினிகாந்த் நடித்தார்.

பகலில் கண்ணியமான பேராசிரியராக இருக்கும் அவர், இரவில் குற்றவாளிகளை வேட்டையாடும் இன்னொரு மனிதராக உலா வருவார். ஒருகட்டத்தில் அவர் யார் என்பது பாக்யராஜ் மூலமாக வெளியுலகுக்கு தெரியவரும். நீதிமன்றத்தில் ரஜினிக்கு சாதகமாக பாக்யராஜ் வாதிடும் காட்சிகள் அன்று ரசிகர்களை பெரிதும் கவர்ந்தன.

இரண்டு பெரும் நாயகர்களின் படங்கள் ஒன்றாக வெளியாகி இரண்டுமே வெற்றி பெற்றன. எனினும் வசூலிலும், ஓடிய தினங்களிலும் காக்கி சட்டை நான் சிகப்பு மனிதனை முந்திக் கொண்டது. அதேபோல் உதயகீதம் படமும் பல இடங்களில் நான் சிகப்பு மனிதனை பின்னுக்குத் தள்ளியது.

இதில் இன்னொரு சுவாரஸியம், அன்று பாக்யராஜே ஒரு பெரிய ஹீரோதான். அவர் நான் சிகப்பு மனிதனில் நடிக்க, அவரிடம் உதவி இயக்குனர்களாக இருந்த ஜி.எம்.குமார், லிவிங்ஸ்டன் இருவரும் காக்கி சட்டை படத்தின் திரைக்கதையில் பணியாற்றினர். குருவின் படத்தை சிஷ்யர்கள் வேலை செய்த படம் பின்னுக்குத்தள்ளி முதலிடத்தைப் பிடித்தது.

அன்றைய காலகட்டத்தில் சென்னையில் ஒரு படம் 40 லட்சங்களை கடப்பது சாதனை. காக்கி சட்டை தேவிபாரடைஸில் 126 நாள்களும், உதயம், ஸ்ரீ கிருஷ்ணாவில் தலா 100 நாள்களும், அன்னை அபிராமியில் 126 நாள்களும் ஓடி மொத்தமாக 42.76 லட்சங்களை வசூல் செய்து சாதனைப் படைத்தது.

இதனை அந்தக் காலத்தில் பாக்யராஜின் முந்தானை முடிச்சு, டி.ராஜேந்தரின் மைதிலி என்னை காதலி படங்கள் மட்டுமே செய்திருந்தன. பிறகு 1989 இல் வெளிவந்த கமலின் அபூர்வ சகோதரர்கள் நான்கு திரையரங்குகளில் 175 தினங்கள் ஓடி. இந்த மூன்று படங்களின் சாதனையை முறியடித்தது வரலாறு.

ரஜினியின் வெற்றிப் படங்களில் ஒன்றான நான் சிகப்பு மனிதன், மோகனின் வெற்றிப் படம் உதயகீதம், பாலசந்தரின் கல்யாண அகதிகள் மூன்றும் வெளியாகி இன்று 38 வருடங்கள் நிறைவடைகிறது. காக்கி சட்டை நேற்று 38 வருடங்களை நிறைவு செய்து இன்று 39 வது வருடத்தில் காலடி எடுத்து வைக்கிறது.