நடிகர் அஜித்தை பற்றி பலரும் அறிந்திடாத 10 தகவல்கள்...

சிறிய வயதில் இருந்தே மாடலிங் துறையில் சாதிக்க ஆர்வம் கொண்டிருந்த அஜித், பிரபல பின்னணி பாடகர் எஸ்.பி.பாலசுப்பிரமணியத்தின் குடும்ப நண்பர். அப்போது, எஸ்.பி.பி சரணுடன் ஒன்றாக பள்ளி படிப்பை பயின்ற அஜித், சரணின் ஆடையை அணிந்து கொண்டு மாடலிங்கில் பங்கேற்கும் அளவுக்கு, இருவரும் நட்புடன் இருந்ததாக எஸ்.பி.பி பலமுறை நினைவுகூர்ந்துள்ளார்.

அஜித்தின் குரலை கேட்டாலே ரசிகர்கள் உற்சாகம் கொள்கின்றனர். ஆனால், அவரது முதல் படமான அமராவதியில் அவரது குரல் ஏற்கப்படாததால், நடிகர் விக்ரம் தான் டப்பிங் பேசினார். இதேபோன்று, ஆசை திரைப்படத்தில் அஜித்துக்கு பன்னீர்புஷ்பங்கள் படத்தின் நாயகன் சுரேஷ் குரல் கொடுத்தார்.

நடிகர் விக்ரமுடன் நட்பு பாராட்டும் அஜித்துக்கு, விக்ரமின் வெற்றியில் எப்போதுமே ஆர்வம் அதிகம். ரஜினியின் தீ திரைப்படத்தை ரீமேக் செய்து அதில் விக்ரமுடன் நடிக்க விரும்பிய அஜித், அமிதாப் பச்சன் தயாரித்த ‘உல்லாசம்’ திரைப்படத்தில் விக்ரமுடன் இணைந்து நடித்தார்.

கார்த்திக், பார்த்திபன் என மல்டி ஸ்டார் படங்களில் ஈகோ இல்லாமல் தோன்றினார்.

நடிகர் ரஜினி அளித்த ‘The Himalayan Masters' என்ற புத்தகம்தான் தன் வாழ்வையே மாற்றியது என அஜித் தெரிவித்தார். ரஜினி மீது மரியாதை கொண்ட அஜித் கேட்டவுடன், தனது பில்லா படத்தை ரீமேக் செய்யும் உரிமையை அஜித்துக்கு வழங்கினார் ரஜினி.

நடிகர் ஷாரூக் கானுக்கு தமிழ்நாட்டில் உள்ள நண்பர்களில் முக்கிமானவர் அஜித். ஷாரூக் கானுக்காகவே அவரது அசோகா திரைப்படத்தில் சிறப்பு தோற்றத்தில் நடித்துக் கொடுத்தார் அஜித்.

அஜித் தனது ரசிகர் மன்றங்களை கலைத்து 12 ஆண்டுகள் ஆனாலும், அவர் மீதான அபிமானம் மட்டும் அவரது ரசிகர்களுக்கு குறையவில்லை. தன் பெயரை அரசியலில் பயன்படுத்துகிறார்கள் என்பதற்காகவே மன்றங்களை கலைத்த அஜித், அரசியலில் தொடர்பற்றவராக இருந்தாலும், தமிழ்நாடு அரசியலை உன்னிப்பாக கவனிப்பதாக அவருடன் நெருங்கி பழகுபவர்கள் தெரிவிக்கின்றனர்.

புகைப்படம் எடுப்பதில் அதீத ஆர்வம் கொண்ட அஜித், அதற்கென ஒரு ஸ்டுடியோவையே தன் வீட்டில் அமைத்துள்ளார். நடிகர் அப்புக்குட்டியை வைத்து அவர் நடத்திய ஃபோட்டோ ஷூட் இன்றளவும் பிரபலமானது.

சமையல், விளையாட்டு உள்ளிட்டவற்றிலும் அதிக ஆர்வம் காட்டும் அஜித், புதிய தொழில்நுட்பங்களை அறிவதில் அதீத ஆர்வம் கொண்டவர். துப்பாக்கி சுடுதலிலும் தடம் பதித்தவர். கோவையில் நடந்த போட்டியில் 6 பதக்கங்கள் வென்று அசத்தினார்

இருசக்கர வாகனம் மற்றும் கார் பந்தயங்களிலும் உயிரை பொருட்படுத்தாது ஈடுபடுபவர். ஃபார்முலா ரேஸ் பந்தயங்களில் இந்தியாவின் மிகச்சிறந்த ஓட்டுநர்களில் 3ஆம் இடம் வரை முன்னேறிய பெருமை உடைய அஜித், ஃபார்முலா-2 ரேஸ் பந்தயத்திலும் பங்கேற்றுள்ளார்.

கார் பந்தயங்களின் போது விபத்துக்குள்ளாகி முதுகு தண்டுவடத்தில் L4, L5 ஆகிய 2 டிஸ்க்குகளை இழக்கும் அளவிற்கு பாதிக்கப்பட்டாலும் நம்பிக்கையை இழக்காதவர். செயற்கை டிஸ்க்குகள் பொருத்தியிருந்தாலும் ஆபத்தான சண்டை காட்சிகளிலும், நடன காட்சியிலும் அவர் அசத்துவது திரையுலகினரை மட்டுமல்ல அனைவரையுமே வியக்க வைக்கும் ஒன்றுதான்.