ரசிகர்கள் மனங்களை கொள்ளை கொண்ட சாய் பல்லவி பிறந்தநாள்!

நடிகையும், நடனக் கலைஞருமான சாய் பல்லவி  1992 ஆம் ஆண்டு மே மாதம் 9 ஆம் தேதி தமிழ்நாட்டிலுள்ள கோத்தகிரியில் பிறந்தார்.

சாய் பல்லவி 2016 ஆம் ஆண்டு சியார்ச்சியா திபிலீசி மாநில மருத்துவப் பல்கலைக் கழகத்தில் தன்னுடைய மருத்துவப் படிப்பை முடித்துள்ளார்.

2015 ஆம் ஆண்டு மலையாளத்தில் 'பிரேமம்' திரைப்படம் மூலம் திரையுலகில் அறிமுகமானார்.

மாபெரும் வெற்றிப் படமாக ஓடிய பிரேமம் திரைப்படத்தில் நடிகர் நிவின் பாலியுடன் இவர் நடித்திருந்த 'மலர்' என்ற கதாபாத்திரத்தின் மூலம் ரசிகர்கள் மனதில் இடம்பிடித்தார் சாய்பல்லவி.

அதன் பின்னர் 2016 ஆம் ஆண்டு துல்கர் சல்மானுடன் இணைந்து நடித்திருந்த 'கலி' என்ற திரைப்படத்தில் நடித்திருந்தார்.

அதையடுத்து வருண் தேச்சுக்கு ஜோடியாக இவர் நடித்திருந்த 'பிடா' திரைப்படம் மூலம் 2017 இல் தெலுங்கு திரைப்பட உலகில் அறிமுகமானார்.

பிடா திரைப்படத்தில் இவர் நடித்த 'பானுமதி' என்ற கதாபாத்திரத்தின் மூலம் தெலுங்கு ரசிகர்களின் மனதிலும் நிரந்தர இடம் பிடித்துவிட்டார் சாய்பல்லவி.

குறிப்பிட்ட தெலுங்கு தொலைக்காட்சியில் 'பிடா' திரைப்படம் ஒளிபரப்பப்பட்டபோது தொலைக்காட்சிகளுக்கான தரவரிசையில் ஐந்தாவது முறையாக அதிகபட்ச இலக்கு அளவீட்டுப் புள்ளியை எட்ட இப்படம் காரணமாக இருந்தது என்பது குறிப்புடத்தக்கது.

இதையடுத்து ஏ.எல்.விஜய் இயக்கிய 'தியா' திரைப்படத்தின் மூலம் தமிழில் நடிகையாக அறிமுகமானார் சாய் பல்லவி.

அதன் பின்னர் தனுஷ் நடித்த மாரி 2 திரைப்படத்தில் அவருக்கு ஜோடியாக நடித்திருந்தார்.

அந்த படத்தில் இடம்பெற்றிருந்த 'ரவுடி பேபி' பாடல் மிகப்பெரிய அளவில் வெற்றி பெற்றது.

இந்த பாடலுக்கு நடிகர் பிரபுதேவா நடனம் அமைத்திருந்தார் என்பது குறிப்பிடத்தக்கது.

2019 ஆம் ஆண்டு சூர்யாவுடன் 'என்ஜிகே' என்ற படத்தில் நடித்தார். ஆனால், இப்படம் எதிர்பார்த்த அளவு வரவேற்பை பெறவில்லை என்றே கூறலாம்.

தமிழ், தெலுங்கு, மலையாளம் என அனைத்து மொழிகளிலும் முன்னணி நடிகையாக வலம் வருகிறார் சாய் பல்லவி.

நானி நடிப்பில் தமிழ், தெலுங்கு, மலையாளம் மற்றும் கன்னட மொழியில் வெளியாகியுள்ள ‘ஷியாம் சிங்கா ராய்’ படத்தில் சாய் பல்லவி முக்கிய கதாபாத்திரத்தில் நடித்துள்ளார்.

தெலுங்கில் நாக சைதன்யாவுடன் இவர் இணைந்து நடித்த ‘லவ் ஸ்டோரி’ திரைப்படம் மிகுந்த வெற்றிப் பெற்றது.

தெலுங்கில் ராணா டகுபதிக்கு ஜோடியாக சாய் பல்லவி நடித்துள்ள 'விராட பருவம்' என்கிற திரைப்படம் வருகிற ஜூலை 1ஆம் தேதி வெளியாகிறது.

இப்படத்தில் நடிகை சாய் பல்லவி நக்சலைட்டாக நடித்துள்ளார்.

சாய் பல்லவி 2008ஆம் ஆண்டு விஜய் டிவியில் ஒளிபரப்பான ‘ உங்களில் யார் அடுத்த பிரபுதேவா ‘ ரியாலிட்டி நடன நிகழ்ச்சியில் போட்டியாளராக பங்குகொண்டு இறுதி போட்டி வரை சென்றார் என்பது குறிப்பிடத்தக்கது.

இவரது தங்கை பூஜா கண்ணன் ஸ்டண்ட் மாஸ்டர் சில்வா இயக்கிய "சித்திரைச் செவ்வானம்" படத்தில் நடித்துள்ளார்.

2009ஆம் ஆண்டு E டிவி என்ற தெலுங்கு சேனலில் நடைபெற்ற 'தி அல்டிமேட்டு டேன்சு' நிகழ்ச்சியிலும் கலந்து கொண்டார்.

நடிகை சாய் பல்லவிக்கு இன்ஸ்டாகிராமில் 5.4 மில்லியன் பின்தொடர்பாளர்கள் உள்ளனர்.

நடிகை சாய் பல்லவி ( Image :Instagram @saipallavi.senthamarai)