'’ஹேப்பி பர்த்டே லவ்!” கணவர் சரத்குமாரின் பிறந்தநாளை விருந்து வைத்து கொண்டாடிய நடிகை ராதிகா – வைரல் புகைப்படங்கள்

நடிகர் மற்றும் அரசியல் பிரமுகருமான சரத்குமார் தனது பிறந்தநாளை கடந்த ஜூலை 14 ஆம் தேதி கொண்டாடினர். சரத்குமாரின், அருமையான அன்பான மனைவி ராதிகா, தன் கணவரின் பிறந்த நாளை மிகச் சிறப்பாகக் கொண்டாடி மகிழ்ந்தார். இதற்காக, சிறப்பு ஏற்பாடுகளை செய்திருந்தார் என்பது குறிப்பிடத்தக்கது. ராதிகா மற்றும் சரத்குமார், இருவருமே, பிறந்த நாள் கொண்டாட்ட புகைப்படங்களை தங்களது சமூக வலைத்தளங்களில் பகிர்ந்துள்ளனர்.

சரத்குமார் பிறந்தநாள் கொண்டாட்டத்தில், ராதிகா தங்கள் குடும்ப உறுப்பினர்கள் மற்றும் நெருங்கிய நண்பர்களுக்கு மட்டுமே அழைப்பு விடுத்துள்ளார். இவர்களுக்காக அதற்காக ஒரு ஸ்பெஷல் விருந்தை ஏற்பாடு செய்திருந்தார்.

ராதிகாவின் மகள் ரயானே மிதுன், மற்றும் அவரின் கணவர் அபிமன்யு மிதுன், ஐஷ்வர்யா சுதர்சன் மற்றும் பலர் விருந்தில் கலந்து கொண்டனர். வரலட்சுமி சரத்குமாரும், சரத் ராகுலும் வெளியூரில் இருப்பதால், பிறந்த நாள் விழாவில் கலந்து கொள்ள முடியவில்லை.

சரத்குமாருக்கு பலர் பிறந்த நாள் வாழ்த்துகள் தெரிவித்த வீடியோக்களை ஒன்றிணைத்து, ராதிகா ஒரு வீடியோவை இன்ஸ்டாகிராமில் வெளியிட்டார் ‘இரும்பு மனிதர், தங்கமான இதயம் கொண்டவர்’ என்ற கேப்ஷனுடன் அந்த பதிவை வெளியிட்டார்.

மேலும், “அவருக்கு கொடுக்க மட்டும் தான் தெரியும். இந்த உறுதியான, இரும்பு போன்ற மனிதர் எங்கள் வாழ்வில் கிடைத்ததற்கு நாங்கள் மிகவும் அதிர்ஷ்டம் செய்திருக்கிறோம். நான் எவ்வளவு மகிழ்ச்சியாக உணர்கிறேன் என்று வார்த்தைகளால் கூற முடியவில்லை. உங்களுக்கு வாழ்வில் சிறந்தது மட்டுமே கிடைத்து, மிகவும் மகிழ்ச்சியாக இருக்க வேண்டும் என் மனதின் ஆழத்திலிருந்து வாழ்த்துகிறேன். ஹேப்பி பர்த்டே லவ்!” என்று நெகிழ்ச்சியாக பதிவு செய்திருந்தார்.

ராதிகாவின் இந்த அழகான வாழ்த்துக்கு, சரத்குமார் நன்றி தெரிவித்து அற்புதமாக பதிவு செய்திருந்தார்.‘பிறந்த நாள் வாழ்த்து தெரிவித்ததற்கு நன்றி. உன்னுடைய வாழ்த்தில், உனக்கு என் மேலிருக்கும் அன்பின் ஆழமும், காதலும், மரியாதையும், அழகாக வெளிப்பட்டது. பரஸ்பர ஆதரவாக, ஒருவர் மீது மற்றொருவர் பெரிய அபிமானம் வைத்திருக்கிறோம். கடினமாக காலங்களில் மகிழ்ச்சியை உணர, துணையாக இருந்ததற்கு நன்றி’

அது மட்டுமின்றி, சரத்குமார் பிறந்தநாள் ஸ்பெஷல் விருந்தின் புகைப்படங்களையும் பகிர்ந்துள்ளார். ‘குடும்பத்துடன், வீட்டிலேயே பிறந்த நாள் விருந்து. வருவும், ராகுலும் ஹைதராபாத் மற்றும் சிங்கப்பூரில் இருந்து வாழ்த்தியுள்ளனர்’ என்றும் குறிப்பிட்டிருந்தார்.

குடும்பத்தினர், நெருங்கிய நண்பர்கள் மட்டுமின்றி, சரத்குமாரின் பிறந்தநாளுக்கு திரைத்துறை நண்பர்கள், ரசிகர்கள் மற்றும் நண்பர்கள் அனைவரும் வாழ்த்து தெரிவித்துள்ளனர். நடிகை சோனியா அகர்வால் உட்பட, பலரும் பிறந்தநாள் வாழ்த்து தெரிவித்துள்ளனர்.

தற்போது, ராதிகா மற்றும் சரத்குமார், இருவருமே மிகவும் பிசியாக இருக்கின்றனர். அரசியல் வேலைகள், திரைப்படங்கள் மட்டுமன்றி, இந்த ஜோடி தற்போது டிவி ஷோக்களை தயாரிப்பதில் ஈடுபட்டுள்ளது.

சின்னத்திரை மற்றும் வெள்ளித்திரையில் கொடி கட்டி பறந்த நடிகை ராதிகா, பல ஹிட் சீரியல்களை, தயாரித்து நடித்துள்ளார். அது மட்டுமின்றி, தொலைக்காட்சி தொகுப்பாளராக, கோடீஸ்வரி மற்றும் தங்கவேட்டை ஆகிய நிகழ்ச்சிகளையும் வழங்கியுள்ளார் என்பது குறிப்பிடத்தக்கது.