2 கிளிகள்.. வீடியோவால் சிக்கல்.. வனத்துறை அதிகாரிகளிடம் சிக்கிய ரோபோ சங்கர்..

அனுமதியின்றி வளர்த்ததாக நடிகர் ரோபோ சங்கர் வீட்டிலிருந்து இரண்டு கிளிகள் கைப்பற்றப்பட்டுள்ளன.

‘கலக்கப்போவது யாரு’ நிகழ்ச்சியில் கலந்து கொண்டு தனது நகைச்சுவையால் மக்களை கவர்ந்தவர் ரோபோ சங்கர். பின்னர் திரைப்படங்களில் நகைச்சுவை நடிகராக அறிமுகமானார். மாரி, வேலைன்னு வந்துட்டா வெள்ளைக்காரன், கலகலப்பு 2 உள்ளிட்ட பல திரைப்படங்களில் ரோபோ சங்கரின் காமெடி ரசிகர்களிடம் நல்ல வரவேற்பைப் பெற்றுள்ளன.

சின்னத்திரையில் இருந்து வெள்ளித்திரைக்குச் சென்று வெற்றிகளை குவித்து வருபவர்களின் பட்டியலில் ரோபோ சங்கர் பெயர் கண்டிப்பாக இருக்கும். இவரது மகளான இந்திரஜா ‘பிகில்’ படத்தில் பாண்டியம்மா என்ற கேரக்டரில் நடித்து அசத்தினார்.

நடிகர் ரோபோ சங்கர் சென்னையில் உள்ள தனது வீட்டில் இரண்டு கிளிகளை வளர்த்து வந்ததாகக் கூறப்படுகிறது. இந்நிலையில் அவரது வீட்டுக்கு வந்த வனத்துறை அதிகாரிகள் அனுமதியின்றி கிளிகளை வளர்த்ததாகக் கூறி அவற்றை எடுத்து சென்றனர்.

யூடியூபில் பதிவிட்ட வீடியோவில் கிளிகள் தொடர்பாக தகவல் வெளியானதால் இது குறித்து வனத்துறைக்கு யாரோ புகாரளித்துள்ளனர். அதன்படியே தற்போது அதிகாரிகள் நடவடிக்கை எடுத்துள்ளதாக கூறப்படுகிறது