ரயில்வே துறையில் 3 லட்சம் காலிப்பணியிடங்கள் - மத்திய அமைச்சர் தகவல்!

இந்தியன் ரயில்வேயில் உள்ள காலிப்பணியிடங்கள் குறித்து எம்.பி. பிரமோத் திவாரியால் ரயில்வே அமைச்சகத்திடம் கேள்வி எழுப்பப்பட்டது. அதற்கு ரயில்வே துறை அமைச்சர் அஸ்வின் வைஷ்ணவ் பதிலளித்துள்ளார்.

அதில் ரயில்வேயில் மொத்தம் 2,98,973 காலிப்பணியிடங்களை நிரப்பப்படாமல் உள்ளதாகத் தெரிவித்துள்ளார். மொத்தம் 17 ஜோன் பிரிவு வாரியாக உள்ள காலிப்பணியிடங்களின் எண்ணிக்கை அளிக்கப்பட்டுள்ளது.

அதிகபட்சமாக வடக்கு பகுதி ரயில்வேயில் 38,967 காலிப்பணியிடங்களும், குறைந்தபட்சமாகத் தென் மேற்கு ரயில்வேயில் 6,581 காலிப்பணியிடங்கள் உள்ளதாகத் தெரிவிக்கப்பட்டுள்ளது.

தொடர்ந்து, மெட்ரோ ரயில் பிரிவில் 1,069 காலிப்பணியிடங்கள் நிரப்பப்படாமல் உள்ளது. இதில் 1,39,050 காலிப்பணியிடங்கள் குரூப் சி தேர்வுகள் மூலம் நிரப்ப பணித்தொடங்கி விட்டதாகவும் கூறப்பட்டுள்ளது.

மேலும் உள்ள இதர காலிப்பணியிடங்கள் ரயில்வே தேர்வு வாரியம் மூலம் விரைவில் நிரப்பப்படும் என்று தெரிவிக்கப்பட்டுள்ளது. இந்த குறிப்பிட்ட காலிப்பணியிடங்கள் ரயில்வேயில் அனைத்து பிரிவுகளுக்குச் சேர்த்து வெளியிடப்பட்டுள்ளது. வரும் காலங்களில் விரைவில் இப்பணியிடங்கள் நிரப்பப்படவுள்ளது.