தொடர் விடுமுறை.. கொடைக்கானலுக்கு படையெடுக்கும் மக்களால் ஊர்ந்து செல்லும் வாகனங்கள்!

தொடர் விடுமுறையை முன்னிட்டு கொடைக்கானலில் சுற்றுலாப் பயணிகள் குவிந்துவருகின்றனர். ந‌க‌ர் ப‌குதிக‌ளில் சுமார் 3 கிமீ தூரத்திற்கு மேலாக‌ சுற்றுலா ப‌ய‌ணிக‌ளின் வாகனங்கள் ஊர்ந்து சென்றது.

த‌மிழ்புத்தாண்டு ம‌ற்றும் ச‌னி, ஞாயிறு தொட‌ர் விடுமுறையினை முன்னிட்டு த‌மிழ‌க‌ம் ம‌ட்டுமின்றி கேர‌ளா, க‌ர்நாட‌கா, ஆந்திரா, உள்ளிட்ட‌ ப‌ல்வேறு மாநில‌ங்க‌ளில் இருந்தும் கொடைக்கான‌ல் ம‌லைப்ப‌குதிக‌ளில் நில‌வும் இத‌மான‌ கால‌நிலையினையும், ப‌சுமை போர்த்திய‌ சுற்றுலாத‌ல‌ங்க‌ளையும், மேக‌ம் த‌வ‌ழும் ம‌லை முக‌டுக‌ளையும் க‌ண்டு ர‌சிக்க‌ சுற்றுலாப் பயணிகளின் வ‌ருகை இன்று காலை முத‌லே அதிக‌ரித்து காண‌ப்ப‌ட்ட‌து.

குறிப்பாக உகார்த்தே ந‌க‌ர், க‌ல்ல‌றை மேடு, மூஞ்சிக்க‌ல், லாஸ்காட்சாலை, ஏரிச்சாலை, பிய‌ர்சோழா சாலை உள்ளிட்ட‌ ப‌ல்வேறு இட‌ங்க‌ளில் சுற்றுலாப்பயணிகள் தொட‌ர் வருகையால் போக்குவ‌ர‌த்து நெரிச‌ல் ஏற்ப‌ட்டுள்ள‌து, இத‌னால் சுற்றுலாப்ப‌ய‌ணிகளின் வாக‌ன‌ங்க‌ள் சுமார் 3 கிமீ தூரத்திற்கும் மேலாக‌ ஊர்ந்த‌வாறு சென்ற‌ன‌.

பண்டிகை கால விடுமுறை நாட்களில் போக்குவ‌ர‌த்து நெரிச‌லை க‌ட்டுப்ப‌டுத்த‌ கொடைக்கானல் ம‌லைப்ப‌குதியில் கூடுத‌லாக‌ போக்குவ‌ர‌த்து காவ‌ல‌ர்க‌ளை ப‌ணியில் அம‌ர்த்தி போக்குவ‌ர‌த்து நெரிச‌லை துரித‌மாக‌ சரி செய்ய‌ வேண்டும் என‌வும் சுற்றுலாப்ப‌ய‌ணிக‌ள் கோரிக்கை விடுத்துள்ள‌ன‌ர்.

மூன்று நாள் தொடர் விடுமுறையை முன்னிட்டு கொடைக்கானலுக்கு படையெடுத்து வரும் சுற்றுலா பயணிகளால் இங்குள்ள தங்கும் விடுதிகளில் அனைத்தும் நிர‌ம்பியுள்ள‌தும் குறிப்பிடத்தக்கது. சுற்றுலாப்ப‌ய‌ணிக‌ளின் தொட‌ர் வ‌ருகையால் சுற்றுலா தொழில்புரிவோர் அனைவ‌ரும் ம‌கிழ்ச்சிய‌டைந்துள்ள‌ன‌ர்.