அனல் மேலே பனித்துளி.. பனியில் உறைந்த கொடைக்கானல்..பார்த்தாலே குளிரும் போட்டோஸ்!

கொடைக்கானலில் மீண்டும் தொட‌ரும் உறைபனி சீசனால் ஆங்காங்கே பனி உறைந்து காணப்படுகிறது.

திண்டுக்கல் மாவட்டம் கொடைக்கானலில் வருடந்தோறும் டிசம்பர் மற்றும் ஜனவரி மாதங்களில் கடும் உறை பனி நிலவுவது வழக்கம், இந்நிலையில் டிசம்பர் மாத‌த்தில் ம‌ழை பொழிவு இருந்த‌தால் உறை பனி சீசன் இல்லாமல் அவ்வப்போது ஓரிரு நாட்களில் மட்டும் உறை பனி நிலவியது.

கொடைக்கானலில் நேற்று பகலில் வெயிலின் தாக்கம் அதிகமாகவும் இரவில் வெப்ப‌நிலை 10  டிகிரி செல்சியஸ் வரை நிலவி வருவதாலும், ம‌லைப்ப‌குதி முழுவ‌தும் க‌டும் குளிர் நிலவி வந்தது.

இந்த நிலையில் இன்று அதிகாலையில் 8 டிகிரி செல்சியஸ்க்கு  குறைவாக வெப்ப நிலை காணப்பட்டு கடும் குளிர் நிலவியதால் பசுமைப் புற்களின் மேல் விழுந்த நீர்ப் பனித் துளிகள் உறைந்து உறைபனியாக மாறிய‌து.

இந்த உறைபனியானது  கொடைக்கானல் நீர்பிடிப்புப் பகுதியான ஜிம்கானா மற்றும் பாம்பார்புர‌ம், அப்ச‌ர்வேட்ட‌ரி உள்ளிட்ட ப‌ல்வேறு பகுதிகளில் அதிக அளவில் காணப்பட்டது. இந்த‌ப் பகுதிகளில் உள்ள பசுமையான புற்களின் மேல் உறைபனி பொழிவு இருந்ததால் வெள்ளைக் கம்பளம் விரித்தது போல் காட்சிய‌ளிக்கிறது.

மேலும் ந‌ட்ச‌த்திர‌ ஏரியிலும் சூரிய‌ ஒளி ப‌ட்ட‌தும் ப‌ட‌ர்ந்திருந்த‌  பனி ஆவியாகி சென்ற‌ காட்சிக‌ளை காணமுடிகிறது.

வாக‌ன‌ங்க‌ளின் மேற்ப‌ர‌ப்பிலும், இலைக‌ள், புற்க‌ளின் மேல் உறை ப‌னி ப‌ட‌ர்ந்திருந்த‌ காட்சிக‌ள் க‌ண்க‌ளுக்கு விருந்த‌ளிக்கும் வகையில் அமைந்திருந்த‌து.

கொடைக்கானலில் நிலவி வரும் கடும் குளிரினால் அதிகாலையிலேயே ஆங்காங்கே பொதும‌க்க‌ள் ம‌ற்றும் சுற்றுலாப்ப‌ய‌ணிக‌ள்  தீமூட்டி குளிர் காய்ந்து குளிரை ச‌மாளிக்கும் ஸ்வெட்டர், ஜ‌ர்க்கீன் உள்ளிட்ட‌ குளிர் ஆடைக‌ளை அணிந்த‌வாறு ந‌ட‌மாடினர்.