தருமபுரியில் சுற்றுச்சூழலைப் பாதுகாக்க 42 ஏக்கரில் மரங்கள்- ஊராட்சி மன்றத் தலைவரின் முயற்சி

பிளாஸ்டிக் ஒழிப்பு, மரங்களை நடுதல், இயற்கை விவசாய முறைகள் என்று பல்வேறு வழிகளில் சுற்றுச்சூழலை பாதுகாக்க பலரும் முயன்று வரும் நிலையில் தருமபுரி மாவட்டம் எர்ரபையனஅள்ளி ஊராட்சியை சேர்ந்த ஊராட்சி மன்ற தலைவர் சிலம்பரசன் 42 ஏக்கர் அரசு புறம்போக்கு நிலத்தில் மரக்கன்றுகளை நட்டு சுற்றுச்சூழலை பாதுகாக்கும் உன்னத முயற்சியில் ஈடுபட்டுள்ளார்.

இரண்டு ஆண்டுகளாக ஊராட்சி மன்ற தலைவராக பதவி வகிக்கும் சிலம்பரசன் எர்ரபையனஅள்ளி ஊராட்சிக்கு உட்பட்ட பகுதியில் கரடுமுரடாக இருந்த 42 ஏக்கர் அரசு புறம்போக்கு நிலத்தை, மகாத்மா காந்தி தேசிய ஊரக வேலை உறுதி திட்ட பணியாளர்களை கொண்டு சமன்படுத்தி, சீர்செய்து அதில் பல்வேறு மரக்கன்றுகளை நட்டுள்ளார்.

சுற்றுச்சூழலை பாதுகாக்க மத்திய மாநில அரசுகள் பல்வேறு நடவடிக்கைகளை மேற்கொண்டு வருகிறது. அரசுடன் பல்வேறு தன்னார்வ அமைப்புகளும் இணைந்து பல்வேறு முயற்சிகளை செய்து வருகிறது. இதற்கு அப்பகுதி பொதுமக்களும், தருமபுரி மாவட்ட நிர்வாகமும் சிறந்த ஒத்துழைப்பை வழங்கியுள்ளது.

தருமபுரி மாவட்ட ஊரக வளர்ச்சி முகமை சார்பில் இப்பகுதியில் தடுப்பணை ஒன்றும் கட்டப்பட்டுள்ளது. இந்த தடுப்பணையில் இருந்து தண்ணீரை எடுத்து இங்கு நடப்பட்டுள்ள செடிகளுக்கு பயன்படுத்தப்பட்டு வருகிறது.

கடந்த ஆண்டு ஆகஸ்ட் 15 ஆம் நாள் சுதந்திர தினத்தன்று இந்த மரக்கன்றுகள் நடும் பணி மகாத்மா காந்தி தேசிய ஊரக வேலை உறுதி திட்டத்தின் மூலம் மேற்கொள்ளப் பட்டது. இதைத்தவிர மூன்று ஏக்கர் பரப்பளவில் குறுங்காடு ஒன்றும் வளர்க்கப்பட்டு வருகிறது.

மா, கொய்யா, சப்போட்டா, பலா உள்ளிட்ட 20 வகையான பல மரங்களும், புளி, தேக்கு, தென்னை, முருங்கை உள்ளிட்ட பல்வேறு வகையான மரங்களும் இங்கு வளர்க்கப்படுகின்றன.
இப்பகுதியில் பறவைகள் அதிக அளவில் வரத் தொடங்கியுள்ளது. பல்லுயிர் பெருக்க திட்டத்தின் மூலம் பல்வேறு நடவடிக்கைகளும் மேற்கொள்ளப்பட்டும் வருகிறது.

இது குறித்து பேசிய ஊராட்சி மன்ற தலைவர் சிலம்பரசன் "தங்கள் ஊராட்சியில் இந்த மரங்களால் கிடைக்கும் வருவாய் மூலம் அடிப்படை தேவைகளான சாலை, குடிநீர் உள்ளிட்ட வசதிகள் ஏற்படுத்தப்பட்டு வருவதாகவும் தங்கள் ஊராட்சி தமிழ்நாடு மாசுக்கட்டுப்பாட்டு வாரியத்தால் சிறந்த ஊராட்சியாக தேர்வு செய்யப்பட்டு, தமிழ்நாடு முதன்மை சாதனையாளர் விருது வழங்கப்பட்டுள்ளதாகவும் தெரிவிக்கிறார்.

மேலும் மாவட்ட நிர்வாகம் சமுதாய கிணறு, ஆள்துளை கிணறு, மேல்நிலை நீர்த்தேக்க தொட்டி உள்ளிட்ட வசதிகளை இந்த மரங்கள் நடப்பட்டு உள்ள பகுதியில் அமைத்து தர வேண்டும் என்று கோரிக்கை வைத்துள்ளதாகவும், மாவட்ட நிர்வாகம் உடனடியாக நிறைவேற்றி தரும் என்று நம்புவதாகவும் தெரிவிக்கிறார்.

ஏற்கனவே இப்பகுதிகளில் பலன் தரும் அளவில் வளர்ந்துள்ள மா மரங்களில் இருந்து கிடைத்த மாம்பழங்கள் வெளிநாடுகளுக்கு விற்பனைக்காக அனுப்பப்பட்டுள்ளதாகவும், அதில் வரும் வருவாய் ஊராட்சி நிதியில் சேர்க்கப்பட்டு, செலவினங்கள் மேற்கொள்ளப்பட்டு வருவதாகவும் சிலம்பரசன் தெரிவித்தார்.