5 வயதுக்குக் கீழ் உள்ள குழந்தைகளிடமிருந்து பரவும் கொரோனா அதிக ஆற்றல் கொண்டது - ஆய்வு

கொரோனா வைரஸ் பெரியவர்களைக் காட்டிலும் வயது குறைந்தவர்களை, குறைவாகவே தாக்குகிறது என உலக சுகாதார அமைப்பே தெரிவித்துள்ளது. ஆனால் ஒருவேளை அவ்வாறு குழந்தைகளைத் தாக்கினால் அவர்களுக்குள் செயல்படும் அந்த வைரஸானது அதிக ஆற்றல் கொண்டது என்கிறது சமீபத்தில் வெளியாகியுள்ள ஆய்வு.

ஐந்து வயதிற்குட்பட்ட குழந்தைகள் ,பெரியவர்களுடன் ஒப்பிடும்போது கொரோனா வைரஸின் 10 முதல் 100 மடங்கு வைரஸ் மரபணுக்களை மூக்கில் கொண்டிருப்பதாக JAMA என்கிற குழந்தைகள் நல இதழ் வெளியிட்டுள்ளது.

எனவே இவர்கள் தங்கள் குடும்ப உறுப்பினர்களுக்குள் வைரஸை தீவிரமாக பரப்பக் கூடியவர்களாக இருப்பார்கள் என்கிறது.

இந்த ஆய்வில் 145 உடல் நலம் பாதிக்கப்பட்டவர்களின் மூக்கின் வழியாக சோதனை செய்துளனர். அவர்களுக்கு சில தீவிரமில்லாத கொரோனா அறிகுறிகளும் இருந்துள்ளன. அந்த 145 பேரில் 46 பேர் 5 வயதுக்குட்பட்ட குழந்தைகள். 51 பேர் 5-17 வயதும், 48 பேர் 18-65 வயதும் கொண்டிருந்தனர்.

இவர்களுக்கு மூக்கின் வழியாக சோதனை நடத்தப்பட்டதில்தான் 5 வயதுக்கு உட்பட்ட குழந்தைகளின் மூக்கில் கொரோனா வைரஸின் மரபணு உற்பத்தி மேல் சுவாச பாதையில் படிந்திருப்பதைக் கண்டுள்ளனர். AFP வெளியிட்ட செய்திக் குறிப்பில் வைரஸ் மரபணுக்கள் என்பது விரைவில், பலரையும் தாக்கும் ஆபத்துக் கொண்டது என ஆய்வு வெளியிட்டது.

வைரஸ் பரப்புவதில் குழந்தைகளுக்கு அதிக பங்களிப்பு இல்லை என்று கூறப்பட்டு வந்த நிலையில் இந்த சமீபத்திய ஆய்வானது அப்படி வைரஸ் தாக்கினால் அவர்கள்தான் பரப்புவதில் திறன் வாய்ந்தவர்களாக இருப்பார்கள். ஏனெனில் அவர்களின் மேல் சுவாசப் பாதையிலேயே இந்த வைரஸானது தங்கி மரபணு மூலக்கூறுகளைக் கொண்டுள்ளன. இது பரவினால் அதீத தீவிர அறிகுறிகளுடன் தாக்கும் ஆபத்தையும் கொண்டது என எச்சரிக்கிறது.