கொரோனா பாதிப்பு: வீட்டிலிருந்தே வேலை செய்யுங்கள்..! - ட்விட்டர் சி.இ.ஓ அறிவிப்பு

கொரோனா வைரஸ் பாதிப்பு காரணமாக நிறுவன ஊழியர்கள் வீட்டிலிருந்தே வேலை பார்த்தால் போதுமானது என ட்விட்டரின் சி.இ.ஓ. ஜாக் டோர்சேவின் தனது ட்விட்டர் பக்கத்தில் பதிவிட்டுள்ளார்.

ஏற்கனவே கூகுள் நிறுவனத்தில் பணிபுரியும் ஒருவருக்கு கொரோனா வைரஸ் பாதிப்பு இருப்பது சென்ற வாரம் உறுதியானநிலையில், கூகுள் நிறுவனம் தங்களது பணியாளர்கள் இத்தாலி, சைனா, ஈரான் போன்ற நாடுகளுக்கு செல்வதைத் தவிர்க்குமாறு பணியாளர்களுக்கு அறிவுறுத்தியது.

அமேசான் நிறுவனம் ஏற்கெனவே வெளிநாட்டு பயணங்களைத் தவிர்க்குமாறு அறிவுறுத்தி வருகிறது. தங்கள் நிறுவனத்தில் பணிபுரியும் பணியாளர்களை, ஏப்ரல் இறுதிவரை விமானப் பயணம் மேற்கொள்வதைத் தவிர்க்கச் சொல்லி அறிவுறுத்தி உள்ளது.

கொரோனா வைரசால் உயிரிழந்தவர்களின் எண்ணிக்கையின் அடிப்படையில் சீனாவுக்கு அடுத்தபடியாக இரண்டாம் இடத்தில் ஈரான் உள்ளது. வைரசால் பாதிக்கப்பட்ட அந்நாட்டு நாடாளுமன்ற உறுப்பினர் முகம்மது மிர்முஹம்மதி உயிரிழந்துள்ளதாக அந்நாட்டு அரசு அறிவித்துள்ளது.

ஈரானின் துணை அதிபர் மற்றும் சுகாதாரத்துறை துணை அமைச்சரும் கொரோனா வைரசால் பாதிக்கப்பட்டுள்ளதை ஈரான் அரசு உறுதி செய்துள்ளது. இதுவரை ஈரானில் 1501 பேருக்கு கொரோனா பாதிப்பு உறுதி செய்யப்பட்டுள்ளது. 66 பேர் உயிரிழந்துள்ளனர்.

ஐரோப்பாவில் அதிக பாதிப்பிற்குள்ளான இத்தாலியில் கொரோனாவால் பாதிக்கப்பட்டவர்களின் எண்ணிக்கை 1,835 ஆக உயர்ந்துள்ளது. வைரஸ் பாதிப்பால் 52 பேர் உயிரிழந்துள்ளதாக அந்நாட்டு அரசு தெரிவித்துள்ளது.

இதற்கிடையில், கொரோனா பாதிப்பின் அறிகுறி தென்பட்டதால், போப் பிரான்சிஸுக்கு பரிசோதனை செய்யப்பட்டது. பின்னர் அவருக்கு வைரஸ் பாதிப்பு இல்லை என்பது உறுதி செய்யப்பட்டுள்ளது.

தென் கொரியாவில், கொரோனா வைரஸுக்கு எதிராக, போர் அறிவிப்பை அந்நாட்டு அதிபர் வெளியிட்டுள்ளார். தென் கொரியாவில் இதுவரை 4812 பேருக்கு கொரோனா பாதிப்பு உறுதி செய்யப்பட்டுள்ள நிலையில், வைரஸ் பாதிப்பால் 34 பேர் உயிரிழந்துள்ளனர்.

போதுமான முக கவசங்கள் கிடைக்காததால் நாட்டு மக்களிடம் மன்னிப்பு கோரியுள்ள அதிபர் மூன்ஜே, அனைவருக்கும் முகக்கவசம் கிடைக்க நடவடிக்கை எடுக்கப்படும் என்று உறுதியளித்துள்ளார்.

அமெரிக்கா முழுவதும் 18 பேருக்கு கொரோனா பாதிப்பு உறுதி செய்யப்பட்டுள்ள நிலையில், அந்நாட்டில் உயிரிந்தவர்களின் எண்ணிக்கை 6 ஆக உயர்ந்துள்ளது. உயிரிழந்தவர்கள் அனைவரும் வாஷிங்டனைச் சேர்ந்தவர்கள்.

பிலிப்பைன்ஸ் செக் குடியரசு நாடுகளில் முதல் கொரோனா பாதிப்பு நேற்று கண்டறியப்பட்ட நிலையில், சவுதி அரேபியா, ஜோர்டான், துனிசியா ஆகிய நாடுகளும் கொரோனா பாதிப்பை உறுதி செய்துள்ளன.

சீனாவில் புதிதாக  125 பேருக்கு கொரோனா பாதிப்பு உறுதி செய்யப்பட்டுள்ளது. அந்நாட்டில் கொரோனா பாதிப்பு தொடங்கியது முதல் புதிதாக பாதிப்புக்குள்ளானவர்களின் எண்ணிக்கை இந்த அளவிற்கு குறைந்திருப்பது இதுவே முதல் முறையாகும்.