தமிழகத்தில் வங்கிகள் இயங்கும் நேரத்தில் மாற்றம்...!

கொரோனா நிவாரணத்தொகையை வாடிக்கையாளர்கள் பெறுவதற்காக வங்கிகள் இயங்கும் நேரம் நீட்டிக்கப்பட்ட நிலையில், தற்போது அதில் மாற்றம் செய்யப்பட்டுள்ளது.

கொரோனா ஊரடங்கு காரணமாக வங்கிகள், பண பரிவர்த்தனை தவிர பிற சேவைகளை மேற்கொள்ளவில்லை. ஊரடங்கு காலத்தில் குறைந்தபட்ச பணியாளர்களைக் கொண்டு காலை 10 மணி முதல் மாலை 2 மணி வரை வங்கிகள் இயங்கும் என்று கூறப்பட்டது.

எனினும், கொரோனா நிவாரணத்தொகையை மத்திய அரசு, வங்கிக்கணக்கின் வழியே செலுத்தியது. குறிப்பாக, ஜன்தன் கணக்கில் மத்திய அரசு ரூ.500 செலுத்தியது.

இந்த தொகையை எடுப்பதற்காக வங்கிகளில் தினமும் கூட்டம் முண்டியடித்தது. இதனால், வங்கிகள் இயங்கும் நேரம் 2 மணி நேரம் நீட்டிக்கப்பட்டது.

இந்த நிலையில், தற்போது மீண்டும் வங்கிகள் இயங்கும் நேரத்தில் மாற்றம் செய்யப்பட்டுள்ளது. ஊரடங்கு இரண்டாவது முறையாக நீடிக்கப்பட்டுள்ள நிலையில், மீண்டும் காலை 10 மணி முதல் பகல் 2 மணி வரை வங்கிகள் இயங்கும் என்று மாநில அளவிலான வங்கிக்கூட்டமைப்பு தெரிவித்துள்ளது.

வாடிக்கையாளர்கள் தங்களது பரிவர்த்தனைகளை பகல் 1 மணிக்குள் முடித்துக்கொள்ள வேண்டும் என்று கேட்டுக்கொள்ளப்பட்டுள்ளது.