தமிழக மாவட்டங்களில் அதிகரிக்கும் கொரோனா பாதிப்பு - சமீபத்திய நிலவரம்

வேலூர் மாவட்டத்தில் இன்று ஒரே நாளில் 206 பேருக்கு கொரோனா தொற்று உறுதியான நிலையில், அம்மாவட்டத்தில் பாதிக்கப்பட்டவர்களின் மொத்த எண்ணிக்கை 10,238 ஆக உயர்ந்துள்ளது.

புதுக்கோட்டை மாவட்டத்தில் புதிதாக 145 பேருக்கு தொற்று ஏற்பட்ட நிலையில், இதுவரையிலான மொத்த பாதிப்பு 5,662 ஆக உயர்ந்துள்ளது.

திருவாரூர் அரசு மருத்துவக்கல்லூரி மருத்துவமனையில் பணியாற்றும் பயிற்சி மருத்துவர் மற்றும் நாகை மாவட்டத்தை சேர்ந்த மருத்துவர் என 2 மருத்துவர்கள், ஒரு சிறப்பு உதவி ஆய்வாளர் உள்பட 2 போலீசார், தனியார் வங்கி மேலாளர் மற்றும் வங்கி ஊழியர் என மொத்தம் புதிதாக 93 பேருக்கு கொரோனா தொற்று உறுதியாகியுள்ளது.

திருச்சி மாவட்டத்தில் திருவெறும்பூர் டி.எஸ்.பி சுரேஷ்குமாருக்கு கொரோனா தொற்று உறுதியானதால், டி.எஸ்.பி அலுவலகத்தில் பணி புரியும் காவலர்களுக்கு பரிசோதனை மேற்கொள்ளப்பட்டுள்ளது.

நவல்பட்டு காவலர் பயிற்சி பள்ளியில் பெண் காவலர்கள் 4 பேருக்கு தொற்று உறுதியாகியுள்ளது. இதே போன்று ராணிப்பேட்டையில் இன்று ஒரே நாளில் புதிதாக 167 பேருக்கும், கன்னியாகுமரியில் ஒரு வனத்துறை அதிகாரி உள்பட 159 பேருக்கும், திருப்பத்தூர் மாவட்டத்தில் புதிதாக 56 பேருக்கும் கொரோனா தொற்று உறுதியாகியுள்ளது.