குழந்தைகளுக்கான அஸ்ட்ராஜெனெகா தடுப்பூசி பரிசோதனை நிறுத்தம்..

அஸ்ட்ராஜெனெகா கொரோனா தடுப்பூசியை குழந்தைகளுக்கு செலுத்தி பரிசோதனை செய்வதை அதனை தயாரித்துள்ள ஆக்ஸ்போர்ட் பல்கலைக்கழகம் தற்காலிகமாக நிறுத்தியுள்ளது.

ஐரோப்பிய நாடுகளில் தடுப்பூசியை செலுத்திக் கொண்ட, வயது வந்தவர்களில் சிலர் ரத்தம் உறைதலால் பாதிக்கப்பட்ட நிலையில் இந்த முடிவு எடுக்கப்பட்டுள்ளது.

இந்த விவகாரத்தில் பிரிட்டன் மருத்துவம் மற்றும் சுகாதாரப் பொருட்கள் ஒழுங்குமுறை ஆணையத்திடம் கூடுதல் தரவுகளை கேட்டிருப்பதாகவும், அதன் அடிப்படையில் அடுத்த கட்ட நடவடிக்கை எடுக்கப்படும் என்றும் ஆக்ஸ்போர்ட் தெரிவித்துள்ளது.

மேலும் பிரிட்டனில் மட்டும் ஒரு கோடியே 80 லட்சம் பேருக்கு ஆஸ்ட்ராஜெனெகா தடுப்பூசி போடப்பட்ட நிலையில், அதில் 30 பேர் ரத்தம் உறைதலால் பாதிக்கப்பட்டுள்ளனர் என்பது குறிப்பிடத்தக்கது.