தடையை மீறி பைக்கில் சுற்றுபவர்களுக்கு எக்ஸாம்... ஃபெயிலானா தோப்பு கரணம்... போலீசார் நூதன தண்டனை

கன்னியாகுமரி மாவட்டத்தில் ஊரடங்கு உத்தரவை மீறி இருசக்கர வாகனத்தில் வெளியே சுற்றியவர்களுக்கு விழிப்புணர்வு தேர்வு நடத்தி போலீசார் நூதன தண்டனை அளித்துள்ளனர்.

கொரேனா வைரஸ் தாக்கத்தை கட்டுபடுத்த நாடு முழுவதும் 21 நாட்கள் ஊரடங்கு உத்தரவு பிறப்பிக்கப்பட்டுள்ளது. ஊரடங்கு உத்தரவை மீறுபவர்கள் மீது காவல்துறையினர் நடவடிக்கை எடுத்து வருகின்றனர்.

கன்னியாகுமரி மாவட்டத்தில் தக்கலை சரக டிஎஸ்பி ராமசந்திரன் தலைமையில் போலீசார் தமிழக கேரள எல்லைப் பகுதியான களியக்காவிளை, குழித்துறை, மார்த்தாண்டம் போன்ற பகுதிகளில் சாலையில் தேவையின்றி சுற்றி திரியும் இளைஞர்கள் மற்றும் பொதுமக்களை தடுத்து நிறுத்தினர்.

போலீசார் அவர்களிடம் கொரோனா விழிப்புணர்வு தேர்வு நடத்தினர். அந்த தேர்வின் போது கொரோனா வைரஸ் முதலில் பரவிய நாடு எது ,கொரானா வைரஸின் காதலி பெயர் என்ன ,கொரானா வைரஸ் அதிகமாக பாதிக்கப்படும் உடல் அமைப்பு மண்டலம் என்ன உள்ளிட்ட கேள்விகள் அடங்கிய வினாத்தாளை அவர்களிடம் கொடுத்தனர்.

அந்த கேள்விகளுக்கு தவறான பதில் எழுதிய ஒவ்வொரு கேள்விக்குக்கும் பத்து தோப்பு கரணம் போடுவதோடு கொரோனா தடுப்பு உறுதிமொழி எடுக்க வைத்தனர். மேலும் பத்து கேள்விகளுக்கான பதில்களை சொல்லி கொடுத்து 144 உத்தரவை மீறுவதால் விதிக்கப்படும் சட்டங்களையும் விளக்கி கொடுத்து அனுப்பி வைத்தனர்.

இதன் மூலம் பொறுப்பு இல்லாமல் 144 உத்தரவை மீறி நடப்போருக்கு விழிப்புணர்வு ஏற்படும் என்று காவல்துறையினர் தெரிவித்தனர்

கொரோனா விழிப்புணர்வு வினாத்தாள்