திருமண ஜோடிகளுக்காக ’வெள்ளி மாஸ்க்’ உருவாக்கிய நகைக் கடை உரிமையாளர்...!

கொரோனா பரவலை கட்டுப்படுத்த அனைவரும் மாஸ்க் அணிந்து வரும் நிலையில், வெள்ளியிலான மாஸ்கை கர்நாடகாவில் உள்ள நகைக்கடை உரிமையாளர் வடிவமைத்துள்ளார்.

கொரோனா பரவலை கட்டுப்படுத்த முகத்தில் உள்ள மூக்கு மற்றும் வாய்ப்பகுதியை மூடுவது அவசியமாக்கப்பட்டது. பல நகரங்களில் மாஸ்க் அணிவது கட்டாயமாக்கப்பட்டுள்ளது.

வீட்டில் இருக்கும் துணிகளைக் கூட மாஸ்க் ஆக பயன்படுத்தலாம் என்று பிரதமர் மோடி வேண்டுகோள் விடுத்திருந்தார். மேலும், அவர் கையால் வீட்டிலேயே தயாரிக்கப்பட்ட மாஸ்க்-ஐ பயன்படுத்தி வந்தார்.

பன ஓலை, பிளாஸ்டிக் கவர் என்று வித்தியாச வித்தியாசமாக மாஸ்குகள் சமூக வளைதளங்களில் டிரெண்ட் ஆனது.

கோவையில் நடிகர்களின் புகைப்படங்கள் அடங்கிய மாஸ்க்கள் தயாரிக்கப்பட்டு விற்பனை செய்யப்படுகின்றன.

இந்த நிலையில், கர்நாடகாவின் கொல்லாப்பூர் பகுதியைச் சேர்ந்த நகைக்கடை உரிமையாளர் ஒருவர் வெள்ளியிலான மாஸ்க்-ஐ தயாரித்துள்ளார்.

திருமண ஜோடிகளுக்காக இந்த மாஸ்க் தயாரிக்கப்பட்டதாகவும், விலை 2500 ரூ முதல் 3500 ரூபாய் வரை எடைக்கு ஏற்ப விற்கப்படுவதாகவும் அவர் தெரிவித்துள்ளார்.