அறிகுறிகளே இல்லாத கொரோனா தொற்று இருக்கிறதா என்பதை எப்படி கண்டறிவது? எளிய வழிமுறைகள் இதோ..

கொரோனா வைரஸ் என்பது மிகவும் மோசமான உயிரைப் பறிக்கும் நோயாக உள்ளது. அதோடு அதன் கோர முகமானது ஒவ்வொரு மாதமும் ஒவ்வொன்றாக இருக்கிறது. அதன் முழுமையான முகத்தைக் கண்டறிய இன்றளவும் ஆய்வாளர்கள் போராடிக்கொண்டிருக்கின்றனர்.

குறிப்பாக அதன் அறிகுறிகள் என்பது ஒவ்வொருவருக்கும் ஒவ்வொன்றாக உள்ளது. சிலருக்கு அறிகுறிகளே இல்லாமலும் இருக்கிறது. இப்படி அறிகுறிகளே இல்லாமல் இருப்பது பாதிக்கப்படவருக்கும் ஆபத்து. பாதிக்கப்படாதவருக்கும் ஆபத்து. குறிப்பாக இது குடும்பு உறுப்பினர்களையும் கடுமையாக பாதிக்கும்.

அறிகுறிகள் இல்லாமல் எப்படி ஒரு வைரஸ் உள்ளே இருக்கும் என்பது பலருக்கும் கேள்வியாக இருக்கலாம். இதற்கு மருத்துவர்கள் கொடுக்கும் விளக்கம் என்னவெனில் அவர்களுக்கு வைரஸை எதிர்கொள்ளும் வலுவான நோய் எதிர்ப்பு சக்தி இருக்கலாம் என்பதுதான்.

இப்படி அறிகுறியே இல்லாத கொரோனா தொற்று பாதிக்கப்பட்டவரை எப்படி அடையாளம் காண்பது..? முக்கியமாக உங்களுக்கு இருக்கிறதா என்பதை எப்படி கண்டறிவது என்கிற குழப்பம் உள்ளதா..? இதற்கு ஒரே தீர்வு கொரோனா பரிசோதனை மட்டும்தான் என்கின்றனர் மருத்துவர்கள்.

அதேபோல் எனக்குத்தான் அறிகுறிகளே இல்லையே நான் எப்படி பரிசோதனை செய்துகொள்வது என்கிற கேள்வியும் எழும்.

இதற்கு மருத்துவர்கள் கூறும் ஒரே பதில் நீங்கள் கட்டாயம் பரிசோதனை செய்துகொள்வதுதான் என்கின்றனர். ஏனெனில் அறிகுறிகளே இல்லாத கொரோனா தொற்றாக இருந்தாலும் அவர் மற்றவர்களுக்கும் பரப்பும் ஆற்றல் உண்டு என ஆய்வுகள் தெரிவிக்கின்றன.

எனவே நீங்கள் மற்றவர்கள் பாதிக்கப்பட தெரிந்தோ , தெரியாமலோ காரணமாகிவிடக் கூடாது. அதேசமயம் உங்களுக்கு ஒருவேளை நோய் எதிர்ப்பு சக்தி குறையத் தொடங்கினால் வைரஸின் ஆற்றல் தீவிரமாக இருக்கலாம்.

எனவே நோய் எதிர்ப்பு சக்தியை அதிகரிப்பதற்கான வேலைகளில் இறங்க வேண்டும். ஆக..உங்களுக்காகவும், உங்களை சுற்றி இருப்பவர்களுக்காகவும் நீங்கள் அறிகுறிகளே இல்லாமல் இருந்தாலும் பரிசோதனை செய்துகொள்வது நல்லது.

உங்கள் மனதிற்குள் தனக்கு தொற்று இருக்குமோ என கொஞ்சம் சந்தேகம் எழுந்தாலும் உடனே பரிசோதனை செய்துகொள்ளுங்கள். ஒருவேளை உங்களுக்கு வைரஸ் இருப்பது உறுதியானால் வீட்டிலேயே 21 நாட்கள் உங்களை தனிமைப்படுத்திக்கொண்டு மருத்துவரை ஆன்லைன் வழியில் தொடர்பு கொண்டு சிகிச்சைப் பெற்றுக்கொள்ளுங்கள் அல்லது அரசு மருத்துவமனை சென்று மருத்துவர்கள் கூறும் அறிவுரைகளைப் பின்பற்றுங்கள்.

பரிசோதனை செய்துகொள்ள விருப்பம் இல்லை என்றால் சந்தேகம் இருப்பின் நீங்களாகவே வீட்டில் 21 நாட்கள் தனிமையில் இருங்கள். வீட்டில் காய்கறிகள், பழங்கள், கீரை வகைகள், இரும்புச் சத்து, புரதச்சத்து, கசாயம், மூலிகை டீ என சாப்பிட்டு வாருங்கள்.