உடல் வெப்பத்தை தணிக்க 3 வேளையும் குளியல் - குஷியில் புதுச்சேரி கோயில் யானை

புதுச்சேரியின் புகழ்மிக்க  மணக்குள விநாயகர் கோயிலில் உள்ள யானை லட்சுமிக்கு உடலின் வெப்பத்தை தணிக்க தினமும் 3 வேளை குளிக்க வைக்கப்படுகிறது.

கொரோனா நோய் பரவலைத் தடுப்பதற்கு ஊரடங்கு உத்தரவு அமல்படுத்திய நாள் முதல் இன்றுவரை வழிபாட்டு தலங்கள் மூடப்பட்டுள்ளன.

புதுச்சேரியின் புகழ்மிக்க  மணக்குள விநாயகர் கோயிலும் கடந்த 40 நாட்களுக்கு மேலாக மூடப்பட்டுள்ளது. இக்கோயிலின் யானையான "லட்சுமி" அருகில் உள்ள ஈஸ்வரன் கோயிலில் வைத்து பராமரிக்கப்படுகிறது.

தற்போது கத்திரி வெயிலில் துவங்கியுள்ள நிலையில் கோவில் யானைக்கு 3 வேளையும் ஷவர் குளியலுக்கு கோயில் நிர்வாகம் ஏற்பாடு செய்துள்ளது.

தினமும்  உணவாக அரிசி சாதம்,5 வித தானியங்களை கொண்ட உணவு, தர்பூசணி, கிர்ணி பழம் போன்றவை அளிக்கப்படுகின்றன. மேலும் யானைக்கு உணவு தயாரிப்பதற்கு முன் கிருமிநாசினி கொண்டு கைகளை சுத்தம் செய்ய வேண்டும், கையுறை, முக கவசம் அணிய வேண்டுமென்று பாகனுகளுக்கு அறிவுறுத்தப்பட்டுள்ளது.

கத்திரி வெயில் காலத்தில் யானைக்கு நோய் வராமல் தடுக்க கால்நடை மருத்துவர் தினமும் பரிசோதனை செய்யவும் ஏற்பாடு செய்யப்பட்டுள்ளது.