செப்டம்பர் முதல் குழந்தைகளுக்கு கொரோனா தடுப்பூசி - ஐசிஎம்ஆர்

இரண்டு முதல் 18 வயதுக்குட்பட்ட குழந்தைகளுக்கான கொரோனா தடுப்பூசி அடுத்தமாதம் முதல் செலுத்த வாய்ப்பு உள்ளதாக ஐசிஎம்ஆர் அதிகாரிகள் தெரிவித்துள்ளனர்.

இந்தியாவில் சிறுவர்களுக்கான தடுப்பூசி சோதனையில் பாரத் பயோடெக் நிறுவனமும், ஜைடஸ் நிறுவனமும் ஈடுபட்டுள்ளன. கோவேக்சின் தடுப்பூசி 2 முதல் 18 வயதுள்ளோர் 525 பேரிடமும், ஜைடஸ் நிறுவனத்தின், ஜைகோவ்-D மருந்து 12 முதல் 18 வயதுக்குட்பட்ட ஆயிரம் பேர் மீதும் பரிசோதனை செய்யப்பட்டு வருகின்றன.

அதில் கோவேக்சின் தடுப்பூசி இறுதிகட்டத்தில் உள்ளதாகவும், உலகிலேயே எந்த நாட்டிலும் இல்லாத வகையில் 2 வயது முதல் உள்ளோருக்காக தடுப்பூசி தயாராகி வருவதாகவும் பாரத் பயோடெக் நிறுவன நிர்வாக இயக்குநர் கிருஷ்ணா எல்லா தெரிவித்துள்ளார்.

இரு நிறுவன தடுப்பூசிகளின் ஆய்வு முடிவுகள் விரைவில் வெளியிடப்பட உள்ளதாக தேசிய வைராலஜி நிறுவன அதிகாரி பிரியா அப்ரகாம் தெரிவித்துள்ளார். விரைவில் இரு மருந்துகளுக்கான ஒப்புதல் கிடைக்கப்பெற்று, செப்டம்பர் மாதம் தடுப்பூசி பயன்பாட்டுக்கு வரும் என்று ஐசிஎம்ஆர் அதிகாரிகள் தெரிவித்துள்ளனர்.