ரூபாய் தாள்கள், செல்போன்கள் உள்ளிட்டவற்றில் 28 நாட்கள் வரை வாழும் கொரோனா - ஆய்வு முடிவுகள் வெளியீடு

ஆஸ்திரேலியாவின் நோய் தொற்று நிறுவன ஆராய்ச்சியாளர்கள் கொரோனா குறித்த தங்களது ஆய்வு முடிவுகளை வெளியிட்டுள்ளனர். சார்ஸ் கோவ் 2 ஆயுளை அவர்கள் 3 விதமான வெப்பநிலைகளில் பரிசோதித்துள்ளனர்.

அவர்களது ஆய்வில் வெப்பம் அதிகரிக்கும் போது கொரோனா உயிர்வாழும் காலஅளவு குறைவதாக ஆய்வு முடிவுகள் தெரிவித்துள்ளன.

குளிர்ச்சியான, ஒளி குறைந்த இடங்களில் உள்ள ரூபாய் நோட்டுகள் மற்றும் செல்போன்களில் கொரோனா 28 நாட்கள் வரை உயிர் வாழும் என்றும் கூறப்பட்டுள்ளது.

அதாவது 20 டிகிரி செல்சியசில் செல்போன்களின் தொடுதிரைகள், பிளாஸ்டிக் ரூபாய் நோட்டுகள் உள்ளிட்டவற்றில் 28 நாட்கள் வரை சார்ஸ், கோவ் 2 ஆகியவை உயிர்வாழ்வது உறுதி செய்யப்பட்டுள்ளது.

இதுவே 30 டிகிரி செல்சியசில் 7 நாட்களாக குறைந்து, 40 டிகிரி செல்சியசில் 24 மணிநேரமாக ஆயுட்காலம் குறைகிறது. பருத்தி போன்ற நுண்ணிய மேற்பரப்பு கொண்ட பொருட்களில் குறைந்த காலமே கொரோனா உயிர்வாழ்கிறது.

குறைந்த வெப்பநிலையில் 14 நாட்களும், அதிக வெப்பநிலையில் 16 மணி நேரம் வரையிலும் உயிர்வாழ்கின்றன. கொரோனா தொற்று குறைவதற்கான கால அவகாசம் குறைய வெப்பநிலையே முக்கிய காரணமாக உள்ளதாகவும் ஆய்வாளர்கள் தெரிவித்துள்ளனர்.

தொடுதிரை கொண்ட செல்போன், ஏடிஎம் எந்திரங்கள், பல்பொருள் அங்காடிகளில் உள்ளிட்டவை கொரோனா பரவலில் முக்கிய பங்காற்றுவதாகவும் விஞ்ஞானிகள் கூறியுள்ளனர்.