இந்தியாவில் 1.12 லட்சத்தைக் கடந்த கொரோனா பாதிப்பு - கடந்த 24 மணி நேரத்தில் 5609 பேருக்கு தொற்று உறுதி

இந்தியாவில் கொரோனாவால் பாதிக்கப்பட்டோர் எண்ணிக்கை ஒரு லட்சத்து 12 ஆயிரத்தை கடந்துள்ள நிலையில், குணமடைந்தோர் எண்ணிக்கை 45 ஆயிரத்து 300 ஆக அதிகரித்துள்ளது.

இந்தியாவில் கடந்த 24 மணி நேரத்தில்  5,609 பேருக்கு தொற்று கண்டறியப்பட்டுள்ளதாகவும், 132 பேர் உயிரிழந்ததாகவும் சுகாதாரத்துறை தெரிவித்துள்ளது.

மகாராஷ்டிராவில் ஒரே நாளில் 2, 161 புதிய தொற்றுகள் உறுதி செய்யப்பட்டதை அடுத்து, பாதிப்பு 40 ஆயிரத்தை நெருங்கியுள்ளது.

மகாராஷ்டிராவில் பாதிக்கப்பட்டோரில் 61 விழுக்காட்டினர் மும்பையை சேர்ந்தவர்கள். குஜராத்தில் கொரோனா பாதிப்பு 12, 500ஐயும், டெல்லியில் 11 ஆயிரத்தையும் கடந்துள்ளது.

ராஜஸ்தானில் பாதிப்பு 6ஆயிரத்தை கடந்துள்ள நிலையில், 5 ஆயிரத்துக்கும் அதிகமான பாதிப்புகள் ஏற்பட்ட 7வது மாநிலமாக உத்தர பிரதேசம் மாறியுள்ளது.

கர்நாடகாவில் ஒரே நாளில் 143 புதிய தொற்றுகள் கண்டறியப்பட்டதை அடுத்து, பாதிப்பு 1605 ஆக அதிகரித்துள்ளது.