"போ போ கூட்டம் போடாத போ" வடிவேலு பாணியில் கொரோனோ விழிப்புணர்வு பேனர்களை வைத்த எலக்ட்ரிக்கல் கடை

கொரோனோ அச்சம் காரணமாக பொதுமக்கள் மத்தியில் விழிப்புணர்வு ஏற்படுத்தும் வகையில் மத்திய மாநில அரசுகள் பல்வேறு நடவடிக்கைகளில் ஈடுபட்டு வருகின்றது.

இருந்தபோதிலும் ஹோட்டல், சலூன் கடை உள்ளிட்ட பல்வேறு வர்த்தக நிறுவன கடைகளின் உரிமையாளர்கள் வித்தியாச வித்தியாசமாக விழிப்புணர்வை பொதுமக்கள் மத்தியில் ஏற்படுத்தி வருகின்றனர்.

அதன் ஒரு பகுதியாக புதுச்சேரி மாநிலம் காரைக்கால் மாவட்டத்தை சேர்ந்த எலக்ட்ரிக்கல் கடை நடத்தி வரும் ஜாபர்உசேன் என்பவர் தனது கடை முன்பு வைகைப்புயல் வடிவேலுவின் மிரட்டல் புகைப்படங்களை வைத்து விழிப்புணர்வு ஏற்படுத்தி வருகிறார்.

காரைக்கால் காமராஜர் சாலையில் உள்ள கடையின் வாசலில் "தம்பி போங்க தம்பி போய் மாஸ்க் போட்டு கிட்டு வாங்க'', "போ போ கூட்டம் போடாத போ", டிஸ்டன்ஸ் மெயின்டைன் பண்ணு" போன்ற பிரபலமான வடிவேலுவின் சூனா பானா கதா பாத்திர புகைப்படம், கைப்புள்ள கதா பாத்திர புகைப்படங்களை வைத்து கடைக்கு வரும் கஸ்டமர்களுக்கு விழிப்புணர்வு ஏற்படுத்தி வருகிறார்.

ஏற்கனவே கடையின் வாசலில் ஊழியர்களை நியமித்து கடைக்கு வரும் பொதுமக்களிடம் வாயால் சொல்லி விழிப்புணர்வு ஏற்படுத்தினோம் ஆனால் அப்படி வாய்வழியாக சொன்னதை பொதுமக்கள் பின்பற்ற வில்லை.

ஆனால் தற்போது நகைச்சுவை நடிகர் வடிவேலுவின் புகைப்படங்களை அச்சடித்து பேனர்கள் வைத்த பிறகு வாடிக்கையாளர்கள் நகைச்சுவை உணர்வோடு மாஸ்க் அணிந்துகொண்டு பாதுகாப்பு அம்சங்களோடு கடைக்கு  வருவதாக கடை உரிமையாளர் ஜாபர் உசேன் கருத்து தெரிவித்துள்ளார்.