தமிழகத்தில் 3 லட்சத்தை தாண்டிய கொரோனா பாதிப்பு - 5 ஆயிரத்தை கடந்த உயிரிழப்பு

சுகாதாரத் துறை வெளியிட்டுள்ள செய்தி குறிப்பில், தமிழகத்தில் ஒரே நாளில் புதிதாக 5,914 பேர் பாதிக்கப்பட்டுள்ளதாக கூறப்பட்டுள்ளது. இதனால், ஒட்டுமொத்த பாதிப்பு 3,02,815 ஆக அதிகரித்துள்ளது.

சென்னையில் தொற்று குறைந்துவரும் நிலையில், ஜூன் 2-ம் தேதிக்குப் பின், தொடர்ந்து 4-வது நாளாக ஆயிரத்திற்கும் கீழாகவே தொற்று பாதிப்பு உள்ளது. சென்னையில் புதிதாக 976 பேர் உள்பட இதுவரை 1,10,121 பேர் பாதிக்கப்பட்டுள்ளனர்.

சென்னையைத் தவிர்த்த பிற மாவட்டங்களில் பாதிப்பு தொடர்ந்து அதிகரித்து வருகிறது. செங்கல்பட்டு, காஞ்சிபுரம், திருவள்ளூர் தேனி மாவட்டங்களில் ஒரே நாளில் தலா 390-க்கும் மேல் தொற்று உறுதியாகியுள்ளது. கோவை, கடலூரில் தலா 200-க்கும் மேற்பட்டோருக்கு புதிதாக தொற்று உறுதியாகியுள்ளது.

சென்னையில்  25 பேர் உட்பட மாநிலம் முழுவதும் ஒரே நாளில் 114 பேர் உயிரிழந்தனர். இதனால் தமிழகத்தில் கொரோனா உயிரிழப்பு எண்ணிக்கை 5 ஆயிரத்தை கடந்துள்ளது.

தமிழகம் முழுவதும் ஒரே நாளில் 6,037 பேர் குணமடைந்து வீடு திரும்பினர். குணமடைந்தோர் விகிதம் 80 சதவீதத்தை தாண்டி, மொத்த எண்ணிக்கை 2,44,675 ஆக அதிகரித்துள்ளது.

தமிழகத்தில் ஒரே நாளில் 65, 141 பேருக்கு கொரோனா பரிசோதனை மேற்கொள்ளப்பட்டுள்ளது. இதுவரை பரிசோதனை செய்யப்பட்டவர்களின் எண்ணிக்கை 31,74,849 ஆக உயர்ந்துள்ளது.