அரசு திட்டங்கள் குறித்து பேருந்துகள் மூலம் விழிப்புணர்வு... சூப்பர் ஐடியாவை கையில் எடுத்த தமிழக அரசு

தமிழ்நாடு அரசின் செய்தி மற்றும் மக்கள் தொடர்பு துறை சார்பில், தமிழ்நாடு அரசின் திட்டங்களான முதலமைச்சரின் காலை உணவுத் திட்டம் மற்றும் புதுமைப்பெண் திட்டம் ஆகியவற்றை விளம்பரப்படுத்தும் நோக்கில், சென்னை மாநகர போக்குவரத்து கழக பேருந்துகளில் விளம்பரம் செய்யப்பட்டுள்ளது.

முதற்கட்டமாக, காலை உணவுத் திட்டம் குறித்து விழிப்புணர்வு ஏற்படுத்த 5 பேருந்துகளும், புதுமைப்பெண் திட்டம் குறித்து விழிப்புணர்வு ஏற்படுத்த 5 பேருந்துகள் என 10 பேருந்துகள் ரோஸ், மஞ்சள், நீலம், பச்சை ஆகிய வண்ணங்களில் விளம்பரப்படுத்தப்பட்டுள்ளன.

குறிப்பாக, முதலமைச்சரின் காலை உணவுத் திட்டம் குறித்து விழிப்புணர்வு விளம்பரத்தில் , தமிழ்நாடு முதல்வர் ஸ்டாலின் பள்ளி குழந்தைக்கு உணவு ஊட்டிவிடுவது போல் காட்சிகள் இடம்பெற்றுள்ளன. 

இந்த 10 பேருந்துகளும், அம்பத்தூர் - வேளச்சேரி, திருவொற்றியூர் - கோவளம், சென்ட்ரல் பணிமனை - அண்ணா சதுக்கம், தாம்பரம் - மாமல்லபுரம், பிராட்வே - பூந்தமல்லி, திருவொற்றியூர் - திருவான்மியூர், கலைஞர் நகர் - கேளம்பாக்கம், திருவொற்றியூர் - பூந்தமல்லி, திருவான்மியூர் - மாமல்லபுரம் ஆகிய வழித்தடங்களில் இயக்கப்படுகிறது.

சென்னை பல்லவன் சாலை மத்திய பணிமனையில் இருந்து இந்த பேருந்துகள் தொடங்கி வைக்கப்பட்டன. இந்நிகழ்வில், போக்குவரத்து மேலாண்மை இயக்குநர் அன்பு ஆபிரகாம் தலைமையில், போக்குவரத்து ஊழியர்கள், அலுவலர்கள் பலர் கலந்து கொண்டனர். மேலும், வருங்காலங்களில் தமிழக அரசின் மற்ற துறைசார்ந்த திட்டங்களும் பேருந்துகளில் விளம்பரம் செய்ய திட்டமிட்டுள்ளதாக கூறப்படுகிறது.