Personal Loan வாங்கும் முன்பு நினைவில் வைத்துக்கொள்ள வேண்டியவை!

மாத சம்பள காரர்களுக்கு எதிர்பாராத செலவுகள் வரும் போது அடமானம் இல்லாமல் வங்கிகளில் வேகமாகக் கடன் பெறக்கூடிய ஒரு திட்டம் பர்சனல் லோன் (தனி நபர் கடன்). அடமான கடன்களை விட இதில் வட்டி விகிதம் சற்று அதிகம். இருந்தாலும் இந்தக் கடனை பெற வேண்டும் என்ற சூழலில் நாம் எதை எல்லாம் கவனிக்க வேண்டும் என்று விளக்கமாக இங்குப் பார்ப்போம்.

தகுதி: வங்கி அல்லது நிதி நிறுவனங்களின் பர்சனல் லோன் கால்குலேட்டரை சம்மந்தப்பட்ட இணையதளத்தில் அணுகி அதில் உள்ள கேள்விகளுக்குப் பதில் அளித்துக் கடன் பெறக்கூடிய தகுதியை சரிபார்க்க முடியும். பொதுவாகப் பர்சனல் லோனுக்கான தகுதி உங்கள் மாத வருவாய், திருப்பிச் செலுத்தக்கூடிய திறன், கிரெடிட் ஸ்கோர் போன்றவற்றை வைத்தே முடிவு செய்யப்படும்.

திருப்பிச் செலுத்தக்கூடிய திறன்: எந்த ஒரு கடனாக இருந்தாலும் அதைப் பெற்ற பிறகு, எத்தனை தவணை முறையில் நம்மால் செலுத்த முடியும் என்பதையும் முடிவு செய்ய வேண்டும். வங்கிகள் வருமானத்தை வைத்து கடன் அளித்தாலும் நீண்ட தவணை எனும் போது வங்கிகள் சில விலக்குகளை அளிக்கும்.

முன்பே கடனை அடைக்கக் கட்டணம் எவ்வளவு? கடன் தவணை காலம் முடியும் முன்பே முழுத் தொகையையும் செலுத்த வேண்டும் என்றால் அதற்கான கூடுதல் கட்டணம் எவ்வளவு என்பதைப் பார்க்க வேண்டும். குறைந்த கட்டணம் உள்ள கடனை பெறுதல் நல்லது. கடனை தவணைக்காலம் முடியும் முன்பு செலுத்துவது நல்லது.

வட்டி விகிதம்: தனிநபர் கடனை 15 முதல் 18 சதவீத வட்டி விகிதத்திற்கிடையில் பெறுவது நல்லது. ஆனால் இது தங்களது கிரெடிட் ஸ்கோரை பொறுத்தது. ஒன்றுக்கு மேற்பட்ட நிதி நிறுவனங்களில் வட்டி விகிதம் பற்றி ஆய்வு செய்து தேர்வு செய்ய வேண்டும்.

தவணை செலுத்துதல்: தனிநபர் வங்கி கடன் பெறும் போது குறைந்தது 1 வருடத்திற்கு முன்பே மொத்த தவணையையும் செலுத்த வங்கிகள் அனுமதிப்பதில்லை. தவணை தொகை வட்டி விகிதம், செலுத்த கூடிய காலம் மற்றும் கடனின் மதிப்பைப் பொருத்து மாறும்.