SBI online : இதற்கெல்லாம் இனி கட்டணம் இல்லையாம்! வாடிக்கையாளர்கள் சந்தோஷமா இருங்கள்

நாட்டின் மிகப் பெரிய பொதுத்துறை வங்கியான எஸ்பிஐ வங்கி வாடிக்கையாளர்களுக்கு ஒரு முக்கியமான தகவலை பகிர்ந்துள்ளது. அதைக் குறித்து தான் இங்கு பார்க்க போகிறோம். கண்டிப்பாக இந்த தகவலை ஒவ்வொரு எஸ்பிஐ வாடிக்கையாளர்களும் கட்டாயம் தெரிந்து கொள்ள வேண்டும். வாடிக்கையாளர்கள் சேவையில் பெரும் கவனம் செலுத்தும் எஸ்பிஐ சமீப காலமாக பல்வேறு வசதிகள் மற்றும் சலுகைகளை வழங்கி வருகிறது.

எஸ்பிஐ-யில் லட்சக்கணக்கான மக்கள் சேமிப்பு கணக்கு, பென்சன் கணக்கு மற்றும் சம்பள கணக்குகளை தொடர்கின்றனர். மக்களின் வசதிக்காக ஸ்டேட் பேங்க் ஆஃப் இந்தியா சார்பில் யோனோ மற்றும் யோனோ லைட் ஆப்கள் நடைமுறையில் உள்ளன. அதே போல் எஸ் பிஐயில் ஜன் தன் கணக்கு மிகவும் புகழ் பெற்ற சேமிப்பு கணக்கு ஆகும்.

பிரதான் மந்திரி ஜன் தன் யோஜனா திட்டத்தில் ஏழை எளிய மக்களுக்கு பல்வேறு சலுகைகள் வழங்கப்படுகின்றன. இந்த வகை கணக்குகளின் டிஜிட்டல் பரிவர்த்தனைகளுக்கு கட்டணம் கிடையாது என்று அறிவிக்கப்பட்டிருந்தது. எஸ்.பி.ஐயில் முதலில் இந்த கணக்குகளுக்கு ஒரு மாதத்துக்கு நான்கு முறைக்கு மேல் டிஜிட்டல் பரிவர்த்தனை செய்தால் கட்டணம் வசூலிக்கப்படும் என்று அறிவித்திருந்தது. பின்பு இந்தக் கட்டணத்தை ரத்து செய்வதாக அறிவித்தது.

இருப்பினும் இந்த விஷயத்தில் தொடர்ந்து எஸ்பிஐ வங்கி வாடிக்கையாளர்களிடம் கட்டணம் வசூலித்து வருவதாகத் தகவல்கள் பரவுகின்றன. இதை அவ்வங்கி திட்டவட்டமாக மறுத்துள்ளது. இதுகுறித்து தனது ட்விட்டர் பக்கத்திலும் விரிவான விளக்கமும் அளித்துள்ளது.

எஸ்.பி. ஐ வங்கி தனது ட்விட்டர் பக்கத்தில் வெளியிட்டுள்ள அறிக்கையில் அடிப்படை சேமிப்பு கணக்கு வைத்திருக்கும் வாடிக்கையாளர்களிடம் டிஜிட்டல் பரிவர்த்தனைகளுக்கு கட்டணம் வசூலிப்பதில்லை என்று குறிப்பிட்டுள்ளது. எனவே வாடிக்கையாளர்கள் இனி இதுக் குறித்து எந்த அச்சமும் கொள்ள தேவையில்லை.