11-வது நாளாக இன்றும் பெட்ரோல், டீசல் விலை உயர்வு

கொரோனா ஊரடங்கால் சென்னையில் கடந்த மார்ச் மாதம் 16ம் தேதி முதல் பெட்ரோல் மற்றும் டீசல் விலையில் மாற்றம் இல்லாமல் இருந்தன.

மே மாதத்தில் சர்வதேச அளவில் ஊரடங்கு தளர்வுகள் காரணமாக, பொருளாதார நடவடிக்கைகள் தொடங்கியதை அடுத்து கச்சா எண்ணெய்யின் விலை தொடர்ந்து அதிகரிக்கத் தொடங்கியது.

இதற்கேற்ப மத்திய அரசின் கலால் வரி உயர்வு, மாநில அரசின் மதிப்புக் கூட்டு வரி அதிகரிப்பு போன்றவற்றால் ஜூன் 7ம் தேதி முதல் பெட்ரோல் டீசல் விலை அதிகரிக்க ஆரம்பித்தது.

இந்நிலையில் சென்னையில் பெட்ரோல், டீசல் விலை தொடர்ந்து 11-வது நாளாக உயர்த்தப்பட்டுள்ளது. இதன்படி, ஒரு லிட்டர் பெட்ரோல் 49 பைசா உயர்ந்து 80 ரூபாய் 86 பைசாவுக்கு விற்பனை செய்யப்படுகிறது. டீசல் விலையும் லிட்டருக்கு 52 பைசா உயர்ந்து 73 ரூபாய் 69 பைசாவாக நிர்ணயிக்கப்பட்டுள்ளது.

இதன்மூலம் கடந்த 11 நாட்களில் பெட்ரோல் விலை 5 ரூபாய் 32 பைசாவும், டீசல் விலை 5 ரூபாய் 47 பைசாவும் உயர்த்தப்பட்டிருப்பது வாகன ஓட்டிகள் மத்தியில் கவலையை ஏற்படுத்தியுள்ளது.