ATM Alert | ஏடிஎம்மில் பணம் எடுக்கப் போறீங்களா..? ஏமாறாம இருக்க இதெல்லாம் தெரிஞ்சுக்கோங்க..!

தொழில்நுட்ப வளர்ச்சி காரணமாக டிஜிட்டல் பணப் பரிவர்த்தனைகள் வேகமாக வளர்ந்துள்ள இந்த காலகட்டத்தில், சைபர் குற்றங்களும் அதைவிட பலமடங்கு முன்னேறி நடந்து வருகிறது. அந்த வகையில் மக்களின் பணத்தை கொள்ளையடிக்க ஒரு புதிய வழியை மோசடியாளர்கள் கண்டுபிடித்துள்ளனர். ஏடிஎம்மில் பணம் எடுக்கும்போது உங்கள் கைரேகைகளை கொண்டு ஏமாற்றும் யுக்தியை அவர்கள் பயன்படுத்துகின்றனர். நீங்கள் ஏடிஎம்மில் பணம் எடுத்தால், நீங்கள் இந்த மோசடி செய்பவர்களின் இலக்காக இருக்கலாம்.

நீங்கள் ஏடிஎம்மில் பணம் எடுக்க செல்லும்போது பல பட்டன்களை அழுத்தி தான் சேவையை பெறுவீர்கள். அப்போது மோசடியாளர்கள் பட்டனில் உள்ள உங்கள் கைரேகையைக் கண்டறிய முடியும். அத்துடன் உங்கள் ரகசிய எண் (PIN)-ஐ அறியவும் முடியும். இந்த வழியில், நீங்கள் அறியாமலேயே மோசடிக்குள் சிக்குகின்றீர்கள்.

எனவே, சைபர் விழிப்புணர்வு தினத்தில் யூனியன் பேங்க் ஆஃப் இந்தியா இதுபோன்ற மோசடிகள் குறித்த விழிப்புணர்வு தகவல்களை தருகின்றது. இதுபோன்ற மோசடிகளுக்கு எதிராக நீங்கள் முன்னெச்சரிக்கை நடவடிக்கைகளை எடுக்கலாம் என்று வங்கி கூறியுள்ளது. ஏடிஎம்மில் பணம் எடுக்கும்போது இந்த சில குறிப்புகளைப் பின்பற்றினால் மோசடிகளில் இருந்து தப்பிக்கலாம்.

முதலில் நீங்கள் ஏடிஎம்மில் பணம் எடுக்கச் செல்லும்போது, ​​பணம் எடுத்து முடித்த பிறகு எப்போதும் வேறு சில பட்டன்களை அழுத்தி வரவும். இதன் மூலம் உங்கள் ரகசிய எண் (PIN)-ஐ மோசடியாளர்கள் பிரித்தெடுப்பது கடினமாக்குகிறது.

ஏடிஎம்மில் பணம் எடுக்கச் செல்லும்போது, ​​வேறு ஏதேனும் சாதனங்கள் அதில் இணைக்கப்பட்டுள்ளதா என சுற்றிப் பார்த்து உறுதி செய்துகொள்ளுங்கள்.

பாதுகாப்பை உறுதி செய்யும் வகையில் வீடியோ கேமராக்கள்/சிசிடிவி கேமராக்கள் இல்லாத ஏடிஎம்களைப் பயன்படுத்துவதைத் தவிர்க்கவும்.

ஏடிஎம் மோசடி அல்லது இதுபோன்ற இணைய மோசடியால் பாதிக்கப்பட்டிருந்தால், உடனடியாக 1930 என்ற ஹெல்ப்லைன் எண்ணை அழைக்கவும் அல்லது cybercrime.gov.in போர்ட்டலில் புகாரைப் பதிவு செய்யவும்.