ஹெச்1பி விசா பெற விருப்பமா..? ஆன்லைனில் விண்ணப்பம் செய்யும் வழிமுறை..!

அமெரிக்கா சென்று பணியாற்ற வேண்டும் என்ற கனவு தகவல் தொழில்நுட்பம் மற்றும் மென்பொருள் துறையில் பணியாற்றிக் கொண்டிருக்கக் கூடிய பலருக்கு இருக்கும். அந்நாட்டில் பணியாற்றுவதற்கு ஹெச்1பி விசா கட்டாயம் என்பது எல்லோருக்கும் தெரியும். இதற்காக காத்திருப்பவர்களுக்கு தற்போது அமெரிக்க அரசின் குடியுரிமை மற்றும் உள்நுழைவு சேவை பிரிவின் சார்பில் புதிய வாய்ப்பு வழங்கப்பட்டுள்ளது.

அதன்படி மார்ச் 1ஆம் தேதி தொடங்கி மார்ச் 17ஆம் தேதி வரையில் ஹெச்1பி விசாவுக்கு விண்ணப்பம் செய்யலாம். ஹெச்1பி பதிவுகளுக்காக பிரத்யேகமாக உள்ள myUSCIS தளத்தின் மூலமாக விண்ணப்பிக்கலாம் என்று அமெரிக்க அரசின் குடியுரிமை துறை தெரிவித்துள்ளது.

ஹெச்1பி விசா என்றால் என்ன  : அமெரிக்க நிறுவனங்களில் வெளிநாட்டுப் பணியாளர்களை தொழில்நுட்ப பிரிவு மற்றும் இதர பிரிவு பணிகளுக்காக தேர்வு செய்யும்போது, அவர்களுக்காக வழங்கப்படுகின் குடிநுழைவு அல்லாத வகைதான் ஹெச்1பி விசா ஆகும். இந்தியா, சீனா போன்ற நாடுகளில் இருந்து ஆண்டுதோறும் ஆயிரக்கணக்கான பணியாளர்கள் தேர்வு செய்யப்படும் நிலையில், அவர்களுக்கு இந்த விசா கட்டாயமாகும்.

2024 நிதியாண்டுக்கான பதிவுகளை செய்யும்போது அதற்கான ஒப்புதல் எண் உங்களுக்கு வழங்கப்படும். அந்த எண்-ஐ வைத்து உங்களுக்கான பதிவு எந்த சூழலில் இருக்கிறது என்பதை நீங்கள் கண்டறிய முடியும். இதுகுறித்து அமெரிக்க குடியுரிமை துறை வெளியிட்டுள்ள அறிக்கையில், “விசாவுக்கான பதிவு நிலையை கண்டறிவதற்காக மட்டும் ஒப்புதல் எண்-ஐ நீங்கள் பயன்படுத்திக் கொள்ளலாம். ஆனால், ஆன்லைன் ஸ்டேடஸ் தெரிந்து கொள்ள இந்த எண்-ஐ நீங்கள் பயன்படுத்திக் கொள்ள முடியாது’’ என்று தெரிவிக்கப்பட்டுள்ளது.

எவ்வளவு கட்டணம்  : ஹெச்1பி விசா பெற விரும்பும் வாடிக்கையாளர்கள் myUSCIS தளத்தில் அவர்களது விவரங்களை பதிவு செய்வதுடன், பதிவு கட்டணமாக தலா 10 டாலர் செலுத்த வேண்டும். ஹெச்1பி விசா கோரும் விண்ணப்பதாரர்கள் அல்லது அவர்களின் பிரதிநிதிகள் மூலமாக இந்த கட்டணத்தை செலுத்தியிருக்க வேண்டும்.

இதுகுறித்து குடியுரிமை துறை வெளியிட்டுள்ள அறிக்கையில், “தகுதி வாய்ந்த ஹெச்1பி விசா ஆர்வலர்கள் அல்லது அவர்களது பிரதிநிதிகள் சார்பில் myUSCIS தளத்தை பயன்படுத்தி பதிவு செய்வதுடன் 10 டாலர் பணமும் செலுத்த வேண்டும். விண்ணப்ப பரிசீலனை எலெக்ட்ரானிக் ரீதியாக நடைபெறும்’’ என்று தெரிவிக்கப்பட்டுள்ளது.

அமெரிக்காவில் ஏற்கனவே பணி செய்து வரக் கூடிய பணியாளர்கள் மற்றும் முகவர்கள் கடந்த பிப்ரவரி மாதம் 21ஆம் தேதி நண்பகல் முதல் புதிய அக்கவுண்ட்களை திறந்து விசாவுக்கு பதிவு செய்து கொள்ள அனுமதி அளிக்கப்பட்டுள்ளது. இவர்களை ஏற்கனவே பலன் அடைந்த பதிவுதாரர்கள் என்று அமெரிக்க அரசு வகைப்படுத்துகிறது.