பான் கார்டு - ஆதார் எண் இணைப்பு முக்கியத் தகவல்.. இவர்கள் இணைக்க வேண்டியதில்லை.. விவரம் இதோ!

வரி எய்ப்பு, மோசடி பணப் பரிவர்த்தனை போன்ற நிதி களை தவிர்க்க மக்கள் அனைவரும் பான் எண்ணுடன் ஆதாரை இணைக்க வேண்டும் என வருமான வரித்துறை தொடர்ந்து அறிவுறுத்தி வருகிறது.

வருமான வரிச் சட்டம், 1961 இன் படி, விலக்கு வகையின் கீழ் வராத அனைத்து பான் வைத்திருப்பவர்கள் அனைவரும் தங்கள் பான் எண்ணை ஆதாருடன் இணைப்பது கட்டாயமாகும். வரும் 31ம் தேதிக்கு முன் தங்கள் பான் எண்ணை ஆதாருடன் இணைப்பது கட்டாயமாகும் என வருமானத்துறை அறிவுறுத்தியுள்ளது. 1.4.2023 முதல், இணைக்கப்படாத PAN எண் செயலிழக்கும் என உறுதியாக தெரிவித்துள்ளது. பான் கார்டு செயல் இழந்தால் அதை இணைத்து உருவாக்கப்பட்ட அனைத்து கணக்குகளும் முடங்க வாய்ப்புள்ளது.

இந்நிலையில் யாருக்கெல்லாம் ஆதார் இணைப்பு அவசியமில்லை எனவும் மத்திய அரசு குறிப்பிட்டுள்ளது.
அரசு அறிவிப்பின்படி, வெளிநாடு வாழ் இந்தியர்கள் (என்ஆர்ஐ) பான் ஆதார் அட்டையை இணைக்க வேண்டிய அவசியமில்லை. எனவே நீங்கள் என்ஆர்ஐ ஆக இருந்தால், பான் கார்டை ஆதார் கார்டுடன் இணைக்க வேண்டிய அவசியமில்லை.

80 வயதுக்கு மேற்பட்டவர்கள் கூட பான் கார்டுடன் ஆதார் அட்டையை இணைக்க தேவையில்லை. மூத்த குடிமக்களுக்கு நிவாரணம் வழங்க மத்திய அரசு இந்த முடிவை எடுத்துள்ளது.

அசாம், மேகாலயா, ஜம்மு-காஷ்மீர் ஆகிய மாநிலங்களில் வசிப்பவர்களும் பான் கார்டை ஆதார் அட்டையுடன் இணைக்க அவசியமில்லை. அந்தந்த மாநிலங்களில் உள்ள சிறப்பு நிபந்தனைகள் காரணமாக மத்திய அரசு இந்த முடிவை எடுத்துள்ளது.தனிநபர் அல்லாத நிறுவனங்கள், அதாவது நிறுவனங்கள், அறக்கட்டளைகள் பான் ஆதார் அட்டை இணைப்பு தேவையில்லை. ஆனா தனிநபர்கள் கண்டிப்பாக பான் ஆதாரை இணைக்க வேண்டும்.

பான் ஆதார் அட்டையை இணைப்பதற்கான காலக்கெடுவை மத்திய அரசு ஏற்கனவே பலமுறை நீட்டித்துள்ளது. மேலும் ரேஷன் கார்டு மற்றும் வாக்காளர் அட்டையுடன் ஆதார் இணைக்கும் காலக்கெடுவும் சமீபத்தில் நீட்டிக்கப்பட்டுள்ளது.பான் ஆதார் காலக்கெடுவும் நீட்டிக்கப்படலாம் என சிலர் கணித்து வருகின்றனர். ஆனால், மத்திய அரசு என்ன முடிவு எடுக்கும் என்பதை பொறுத்திருந்து தான் பார்க்க வேண்டும்.