சோனியுடன் கரம்கோர்த்த மஹிந்திரா! 3டி சவுண்ட் சிஸ்டத்தில் வெளியான XUV700 .. விலை தெரியுமா?

மஹிந்திரா நிறுவனத்தின் புதிய மாடலான XUV700 மாடல் சுதந்திரதினத்தையொட்டி வெளியாகி உள்ளது. ஏற்கனவே, கெத்தான ஸ்பெஷல் புரோமோஷன்கள் XUV700 மாடல் காருக்கு செய்யப்பட்டுள்ளதால், மார்க்கெட்டில் இந்த கார் மீதான எதிர்பார்ப்பு மிகப்பெரிய அளவில் இருந்து வந்தது.

மஹிந்திரா அறிமுகப்படுத்தி உள்ள XUV700 மாடல் கார், சோனி நிறுவனத்துடன் கரம்கோர்த்து இன்டர்னலாகவே 3டி சவுண்ட் சிஸ்டம் பொருத்தப்பட்டுள்ளது.

சோனி நிறுவனத்தின் இன்பில்டு 3டி சவுண்ட் சிஸ்டம் இடம்பெறும் இந்தியாவிலேயே முதல் கார் என்ற சிறப்பை மஹிந்திரா XUV700 கார் பெற்றுள்ளது.

காருக்குள் 13 சேனல் ஆம்பிளிபையர் மற்றும் சப்வூஃபர் உள்ளிட்ட 12 ஸ்பீக்கர்கள் இடம்பெற்றுள்ளன. DSEE டெக்னாலஜி பயன்படுத்தப்பட்டு, ஒலி அமைப்பு பிரத்யேகமாக இருக்குமாறு வடிவமைக்கப்பட்டுள்ளது.

வெளியில் இருக்கும் இரைச்சல்களுக்கு ஏற்ப ஆட்டோமேடிக்காக சவுண்ட் அட்ஜெஸ்ட் ஆகுமாறு சவுண்ட் செட்டிங்ஸ் உள்ளது. சோனி இந்தியாவின் நிர்வாக இயக்குநர் சுனில் நாயர் பேசும்போது, இந்தியாவின் மிகப்பெரிய ஆட்டோமொபைல் நிறுவனமான மஹிந்திராவுடன் சோனி கரம்கோர்த்திருப்பது மகிழ்ச்சியளிப்பதாக தெரிவித்துள்ளார்.

பிரத்யேகமான டெக்னாலஜி உதவியுடன் 3டி சவுண்ட் சிஸ்டம் வடிவமைக்கப்பட்டுள்ளதாகவும் அவர் மகிழ்ச்சியுடன் கூறினார். காரில் பயணிக்கும்போது, சோனியின் இந்த புதிய ஒலி அமைப்பு வித்தியாசமான அனுபவத்தைக் கொடுக்கும் எனவும் சுனில் நாயர் கூறினார்.

மஹிந்திரா XUV700 மாடலைப் பொறுத்த வரை பெரிய பானரோமிக் சன்ரூப் உள்ளது. தனிப்பட்ட பாதுகாப்பு எச்சரிக்கை தகவல்கள், ஓட்டுனர் உறக்கத்தில் இருப்பதை கண்டறியும் வசதி போன்ற முன்னெச்சரிக்கை அம்சங்களும் இடம்பெற்றுள்ளன.

காரின் உள்புறம் 3 ஸ்போக் ஸ்டீரிங் வீல், டூயல் ஹெச்.டி. ரெசல்யூஷன் ஸ்கிரீன்- ஒன்று தொடுதிரை வசதி கொண்ட இன்போடெயின்மென்ட் ஸ்கிரீன், மற்றொன்று டிஜிட்டல் இன்ஸ்ட்ரூமென்ட் கிளஸ்டர், டூயல்-ஜோன் கிளைமேட் கண்ட்ரோல், சோனி மியூசிக் சிஸ்டம், மஹிந்திராவின் அட்ரினோ எக்ஸ் ஏ.ஐ. தொழில்நுட்பம் உள்ளிட்டவை இடம்பெற்றுள்ளது.

2 லிட்டர் பெட்ரோல் மற்றும் டீசல் என்ஜினுடன் வெளியாகும் இந்தக் காரில், மேனுவல், ஆட்டோமேடிக் டிரான்ஸ்மிஷன் ஆப்ஷன்கள் கொடுக்கப்பட்டுள்ளன. மஹிந்திரா இந்தியாவின் இயக்குநர் வீஜய் நக்ரா பேசும்போது, அடுத்த தலைமுறை தொழில்நுட்பத்துடன் வெளியாகும் முதல் எஸ்.யூ.வி மாடல் கார் மஹிந்திரா XUV700 எனத் தெரிவித்துள்ளார்.

புதிய டெக்னாலஜி வெளியாகும்போது அதனை அறிமுகப்படுத்துவதில் மஹிந்திரா முன்னணியில் இருப்பதாக கூறிய அவர், மஹிந்திராவின் இந்த புதிய மாடல் வாடிக்கையாளர்களுக்கு வித்தியாசமான அனுபவத்தை கொடுக்கும் என நம்பிக்கை தெரிவித்தார். மேலும், ஏற்கனவே பெரிய எதிர்பார்ப்பு இருப்பதால், விற்பனையிலும் அது எதிரொலிக்கும் என கூறியுள்ளார்.

மஹிந்திரா எக்ஸ்யூவி700 எஸ்யூவி காரின் MX பெட்ரோல் வேரியண்ட்டின் விலை 11.99 லட்ச ரூபாயாக நிர்ணயம் செய்யப்பட்டுள்ளது. அதே சமயம் MX டீசல் வேரியண்ட்டின் விலை 12.49 லட்ச ரூபாய் ஆகவும், AX3 பெட்ரோல் வேரியண்ட்டின் விலை 13.99 லட்ச ரூபாய் ஆகவும், AX5 பெட்ரோல் வேரியண்ட்டின் விலை 14.99 லட்ச ரூபாய் ஆகவும் நிர்ணயம் செய்யப்பட்டுள்ளது. இவை அனைத்தும் எக்ஸ் ஷோரூம் விலையாகும்.