தேர்ட் பார்ட்டி வாகன இன்சூரன்ஸ் கட்டணங்களில் திருத்தம் - புதிய விவரங்களை தெரிந்து கொள்ளுங்கள்

மத்திய சாலைப் போக்குவரத்து மற்றும் நெடுஞ்சாலைத் துறை அமைச்சகத்தின் ஆலோசனையின் பேரில், இந்திய இன்சூரன்ஸ் மற்றும் ஒழுங்குமுறை மற்றும் வளர்ச்சி ஆணையத்தின் (IRDAI) சார்பில், மூன்றாம் தரப்புக்கான (தேர்ட் பார்ட்டி) வாகன இன்சூரன்ஸ் ப்ரீமியங்களை திருத்தி அமைப்பதற்கான வரைவு அறிவிக்கை வெளியிடப்பட்டுள்ளது. முன்னதாக, கொரோனா பெருந்தொற்று காலம் காரணமாக, இந்த இன்சூரன்ஸ் ப்ரீமியம் என்பது கடந்த 2 ஆண்டுகளாக திருத்தி அமைக்கப்படவில்லை.

தற்போது, அவற்றை திருத்தி அமைப்பதற்கான நடவடிக்கைகளை ஐஆர்டிஏ மேற்கொண்டுள்ளது. வாகனத்தை நாம் ஓட்டிச் செல்லும்போது, நம் மூலமாக பிற நபர்களுக்கு ஏற்படும் ஆபத்துகளை ஈடு செய்யும் நோக்கில் பெறப்படுவதே தேர்ட் பார்ட்டி இன்சூரன்ஸ் ஆகும்.

இரு சக்கர வாகனங்கள் : 150 சிசி முதல் 350 சிசி கொண்ட வாகனங்களுக்கு ரூ.1,366 என்றும், 350 சிசிக்கு மேல் கொண்ட பைக்குகளுக்கு ரூ.2,804 என்றும் காப்பீடு ப்ரீமியம் தொகை நிர்ணயிக்கப்பட்டுள்ளது.

கமர்ஷியல் வாகனங்கள் : சரக்குகளை ஏற்றிச் செல்லும் பொது கமர்ஷியல் கனரக வாகனங்களுக்கு ப்ரீமியம் தொகை என்பது ரூ.16,049 முதல் ரூ.44,242 வரையில் இருக்கும். இது வாகனத்தின் மொத்த எடையை அடிப்படையாகக் கொண்டு மாறுபடும். தனியார் வாகனங்களுக்கு இந்த ப்ரீமியம் என்பது ரூ.8,510 முதல் ரூ.25,038 வரையில் இருக்கும்.

நீண்ட கால இன்சூரன்ஸ் : புதிய கார்களுக்கான, 3 ஆண்டு கால சிங்கிள் ப்ரீமியம் இன்சூரன்ஸ் கட்டணமும் திருத்தி அமைக்கப்பட்டுள்ளது. இதன்படி, ப்ரீமியம் கட்டணம் ரூ.6,521 முதல் ரூ.24,596 வரையில் நிர்ணயம் செய்யப்பட்டுள்ளது. இதேபோன்று, இரு சக்கர வாகனங்களுக்கு வசூல் செய்யப்படும் 5 ஆண்டு தர்டு பார்ட்டி இன்சூரன்ஸ் ப்ரீமியம் என்பது ரூ.2,901 முதல் ரூ.15,117 வரையில் இருக்கும். இது வாகனங்களின் வசதிகளைப் பொறுத்து மாறுபடும்.

எப்போது அமலுக்கு வருகிறது இந்த புதிய விதிகள் : கொரோனா பெருந்தொற்று காலம் காரணமாக 2 ஆண்டுகளாகவே தேர்ட் பார்ட்டி இன்சூரன்ஸ் ப்ரீமியத் தொகை அதிகரிக்கப்படாமலேயே நீடித்து வந்தது. இத்தகைய சூழலில், தற்போது அனைத்து இரு சக்கர வாகனங்கள், கார்கள் மற்றும் கமர்ஷியல் வாகனங்களுக்கான இன்சூரன்ஸ் கட்டணம் திருத்தி அமைக்கப்பட்டுள்ளது. இந்தப் புதிய கட்டண முறை ஏப்ரல் 1ஆம் தேதி முதல் அமலுக்கு வருகிறது.

எலெக்ட்ரிக் வாகனங்களுக்கு டிஸ்கவுண்ட் : எலெக்ட்ரிக் கார்கள், எலெக்ட்ரிக் இரு சக்கர வாகனங்கள், எலெக்ட்ரிக் கமர்ஷியல் மற்றும் பயணிகள் வாகனங்களுக்கு திருத்தப்பட்ட காப்பீடு தொகையில் 15 சதவீதம் டிஸ்கவுண்ட் வழங்கப்படும் என்று தெரிவிக்கப்பட்டுள்ளது.