Auto Expo 2023 : ஷாருக்கான் அறிமுகம் செய்த ஹூண்டாயின் புதிய ஈவி கார் ..! விலை எவ்வளவு தெரியுமா..?

ஹூண்டாய் நிறுவனத்திடம் இருந்து பெரிதும் எதிர்பார்க்கப்பட்ட ‘ஹூண்டாய் ஐயோனிக் 5’ (Hyundai Ioniq 5) என்ற கார் விற்பனைக்கு வந்துள்ளது. ஆட்டோ எக்ஸ்ஃபோ 2023 நிகழ்ச்சியில் ஹிந்தி திரைப்பட நடிகரும், ஹூண்டாய் நிறுவனத்தின் விளம்பரத் தூதுவருமான ஷாருக்கான் முன்னிலையில் இந்த கார் அறிமுகம் செய்யப்பட்டது.

முன்னதாக, கோனா எலெக்ட்ரிக் என்ற ஈவி வாகனத்தை ஹூண்டாய் நிறுவனம் இதற்கு முன்பு விற்பனைக்கு கொண்டு வந்திருந்த நிலையில், தற்போது இரண்டாவதாக ஹூண்டாய் ஐயோனிக் 5 என்ற கார் விற்பனைக்கு கொண்டு வரப்பட்டுள்ளது. இந்த ஐயோனிக் காரின் விலை ரூ.44.95 லட்சம் ஆகும்.

விரைவில் டெலிவரி ஆரம்பம் : ஐயோனிக் 5 எலெக்ட்ரிக் காருக்கான முன்பதிவுகள் கடந்த மாதம் தொடங்கி நடைபெற்று வந்தன. ரூ.1 லட்சம் செலுத்தி முன்பதிவு செய்து கொள்ளுமாறு அறிவிக்கப்பட்டிருந்தது. பதிவு செய்திருந்த வாடிக்கையாளர்களுக்கு வெகு விரைவில் கார்கள் டெலிவரி செய்யப்படும் என்று ஹூண்டாய் நிறுவனம் தெரிவித்துள்ளது.

ஹூண்டாய் ஐயோனிக் 5 காரானது ஸ்பார்டினஸ் டிசைன் தீமில் உருவாகியுள்ளது. பாராமெட்ரிக் பிக்ஸல் எல்இடி ஹெட்லாம்ப் மற்றும் கிளாம்ஷெல் போனெட், ஆட்டோ பிளஷ் டோர் ஹேண்டில், பாராமெட்ரிக் பிக்ஸல் டெயில் லைட்ஸ் மற்றும் ஆக்டிவ் ஏரோ அலாய் வீல்ஸ் போன்றவை உள்ளன.

இந்த காரின் நீளம் 4,635 எம்எம் ஆகும். இதன் அகலம் 1,890 எம்எம் ஆகும். இதன் உயரம் 1,625 எம்எம் ஆகும். வீல்பேஸ் 3,000 எம்எம் அளவில் அமைந்துள்ளது. கிராவிட்டி கோல்டு மேட், ஆப்டிக் வொயிட் மற்றும் மிட்நைட் பிளாக் பியர்ல் போன்ற 3 வண்ணங்களில் இந்த கார் விற்பனைக்கு வருகிறது.

கூடுதல் வசதிகள் : ஹூண்டாய் ஐயோனிக் 5 காரில் நீடித்து உழைக்கத்தக்க மற்றும் மறுசுழற்சி செய்யக் கூடிய உயர் தரமான பொருட்களை கொண்டு இண்டீரியர் டிசைன் செய்யப்பட்டுள்ளது. 12.3 இன்ச் டிஜிட்டல் கிளஸ்டர், டச் ஸ்க்ரீன் வசதி கொண்ட இண்ஃபோடெயின்மெண்ட், ஆண்டிராய்டு ஆட்டோ, ஆப்பிள் கார்பிளே போன்ற வசதிகள் உள்ளன.

விபத்தில் இருந்து பயணிகளை காக்க 6 ஏர்பேக்குகள், என்ஜின் பார்கிங் பிரேக், டிஸ்க் பிரேக், 2 ஏடிஎஸ் மற்றும் 72.6 கிலோ வாட் பேட்டரி பேக்கேஜ் போன்றவை இந்த காரில் இடம்பெற்றிருக்கும். ஒருமுறை சார்ஜ் செய்தால் சுமார் 631 கி.மீ. தூரத்திற்கு பயணிக்கலாம். பேட்டரியை சார்ஜ் செய்ய 350 கிலோவாட் கொண்ட டிசி சார்ஜர் இடம்பெற்றிருக்கும். இதை வைத்து 18 நிமிடங்களில் 10 சதவீதம் முதல் 80 சதவீத சார்ஜ் செய்து கொள்ள முடியும். எலெக்ட்ரிக் காரில் தொலைதூரம் பயணம் செய்ய விரும்புபவர்களுக்கு இது உதவியாக இருக்கும்.