• HOME
  • »
  • NEWS
  • »
  • trend
  • »
  • 2068-ல் அபோபிஸ் என்ற சிறுகோள் பூமியைத் தாக்கும் சாத்தியம் இருக்கிறதா? நாசா விளக்கம்!

2068-ல் அபோபிஸ் என்ற சிறுகோள் பூமியைத் தாக்கும் சாத்தியம் இருக்கிறதா? நாசா விளக்கம்!

மாதிரி படம்

மாதிரி படம்

குறைந்தது நூறு ஆண்டு காலத்திற்காவது இந்த அபாயகரமான விண்வெளி பாறையால் பூமிக்கு எந்த ஒரு ஆபத்தும் இருக்காது.

  • News18
  • Last Updated :
  • Share this:
அபோபிஸ் எனப்படும் ராட்சத சிறுகோள் 2068ம் ஆண்டு பூமியை தாக்கக் கூடும் என்றும், இதனால் மனித இனம் அழிய வாய்ப்புள்ளது என்றும் பல அதிர்ச்சி தகவல்கள் கடந்த சில மாதங்களாக பரவி வந்தன. இதனால் பெரும் அச்சங்கள் எழுந்த நிலையில், இந்த குழப்பத்தை தீர்க்கும் வகையில் ஒரு நல்ல செய்தியை நாசா நமக்கு கொடுத்துள்ளது. அதாவது, 2068ம் ஆண்டில் அபோபிஸ் என்ற சிறுகோள் பூமியை பாதிக்கும் என்ற சாத்தியத்தை நாசா நிராகரித்துள்ளது. மேலும் குறைந்தது நூறு ஆண்டு காலத்திற்காவது இந்த அபாயகரமான விண்வெளி பாறையால் பூமிக்கு எந்த ஒரு ஆபத்தும் இருக்காது என்றும் தெரிவித்துள்ளது.

துல்லியமான சுற்றுப்பாதை பகுப்பாய்வோடு இணைக்கப்பட்ட ஒரு புதிய ரேடார் கண்காணிப்பு முடிவுகள் மூலம் அடுத்த 100 ஆண்டுகளுக்கு அபோபிஸ் நமது கிரகத்தை தாக்கும் ஆபத்து இல்லை என்று வானியலாளர்கள் முடிவுக்கு வந்துள்ளதாக நாசா குறிப்பிட்டுள்ளது. 2004 ஆம் ஆண்டில் கண்டுபிடிக்கப்பட்ட, அபோபிஸ் என்ற சிறுகோள் சுமார் 340 மீட்டர் அகலம் கொண்டது என மதிப்பிடப்பட்டது. இது மூன்றரை கால்பந்து மைதானங்களின் அளவுக்கு நிகரானது என்றும் கூறப்பட்டது. மேலும் இந்த சிறுகோள் 2029 ஆம் ஆண்டில் பூமியை நெருங்கி வரும் என்று வானியலாளர்கள் கணித்தபோது அது பூமிக்கு கடுமையான அச்சுறுத்தலை ஏற்படுத்தக்கூடும் என்று எச்சரித்திருந்தனர்.

பூமிக்கு அருகிலுள்ள பொருளின் (NEO) கூடுதல் கண்காணிப்புகளுக்கு பிறகு இந்த கோள் 2029ம் ஆண்டு பூமியை தாக்கும் என்ற கூற்று நிராகரிக்கப்பட்டது. அதேபோல் மற்றொரு நெருக்கமான அணுகுமுறையால் 2036-ல் தாக்கத்தின் அபாயம் இருப்பதாக கூறப்பட்டது. பின்னர் அதுவும் நிராகரிக்கப்பட்டது. இருப்பினும், கடந்த சில மாதங்களாக 2068-ல் இந்த சிறுகோள் பூமியை தாக்கும் என்றும் இது பேரழிவை ஏற்படுத்தும் எனவும் கூறப்பட்டது. இந்த நிலையில், மார்ச் 5 ஆம் தேதி அப்போபிஸ் பூமியின் தொலைதூரப் பயணத்தை மேற்கொண்டபோது, சூரியனைச் சுற்றியுள்ள அதன் சுற்றுப்பாதையின் மதிப்பீட்டை தீவிர துல்லியத்துடன் செம்மைப்படுத்த சக்திவாய்ந்த ரேடார் கண்காணிப்புகளை பயன்படுத்த வானியலாளர்கள் முடிவு செய்தனர்.

அதுவே, 2068 மற்றும் நீண்ட காலத்திற்கு இந்த சிறுகோளால் எந்தவொரு பாதிப்போ அல்லது அபாயமோ ஏற்படாது என்பதைக் கண்டறிய உதவியது. இது குறித்து தெற்கு கலிபோர்னியாவில் உள்ள நாசாவின் ஜெட் ப்ராபல்ஷன் ஆய்வகம் வெளியிட்ட அறிக்கையில், "2068-ல் சிறுகோளின் தாக்கம் சாத்தியம் இல்லை. எங்கள் கணக்கீடுகள் குறைந்தது அடுத்த 100 ஆண்டுகளுக்கு எந்தவிதமான தாக்க அபாயத்தையும் காட்டவில்லை" என்று நிர்வகிக்கப்படும் நாசாவின் பூமிக்கு அருகிலுள்ள பொருள் ஆய்வுகளுக்கான மையத்தின் (CNEOS) டேவிட் பார்னோச்சியா அந்த அறிக்கையில் குறிப்பிட்டுள்ளார்.

Also read... 72 வயதிலும் பளு தூக்கி உடலை கட்டுக்கோப்பாக வைத்து அசத்தும் மலேசிய பாடிபில்டிர்!

மேலும், " சமீபத்திய ஒளியியல் கண்காணிப்புகள் மற்றும் கூடுதல் ரேடார் கண்காணிப்புகளின் ஆதரவுடன், அப்போபிஸின் சுற்றுப்பாதையில் உள்ள நிச்சயமற்ற தன்மை 2029-ல் கணக்கிடப்பட்ட நூற்றுக்கணக்கான கிலோ மீட்டரிலிருந்து தற்போது ஒரு சில கிலோ மீட்டர்களாக சரிந்துள்ளது. 2029 ஆம் ஆண்டில் அதன் நிலையைப் பற்றிய பெரிதும் மேம்படுத்தப்பட்ட அறிவு அதன் எதிர்கால இயக்கத்தின் கூடுதல் உறுதிப்பாட்டை வழங்குகிறது. எனவே இப்போது அப்போபிஸை ஆபத்து பட்டியலில் இருந்து அகற்றலாம்" எனக் கூறியுள்ளார். சமீபத்திய அப்போபிஸ் கணக்கீடுகளுக்காக, வானியலாளர்கள் கலிபோர்னியாவின் பார்ஸ்டோவுக்கு அருகிலுள்ள டீப் ஸ்பேஸ் நெட்வொர்க்கின் கோல்ட்ஸ்டோன் டீப் ஸ்பேஸ் கம்யூனிகேஷன்ஸ் வளாகத்தில் 70 மீட்டர் ரேடியோ ஆண்டெனாவை நோக்கி அப்போபிஸின் இயக்கத்தை துல்லியமாகக் கண்காணித்தனர்.

ரேடார் பிரச்சாரத்திற்கு தலைமை தாங்கிய ஜேபிஎல் விஞ்ஞானி மெரினா ப்ரோசோவிக் கூறியதாவது, "அப்போபிஸ் பூமியுடன் சமீபத்திய நெருக்கமான அணுகுமுறையை மேற்கொண்ட போதிலும், அது இன்னும் 17 மில்லியன் கிலோமீட்டர் தொலைவில் இருந்தது. அப்படியிருந்தும், சுமார் 150 மீட்டர் துல்லியத்திற்கு அதன் தூரம் குறித்த நம்பமுடியாத துல்லியமான தகவல்களை எங்களால் பெற முடிந்தது. இந்த கண்காணிப்புகள் எந்தவொரு தாக்க அபாயத்தையும் நிராகரிக்க எங்களுக்கு உதவியது மட்டுமல்லாமல், இது ஒரு அற்புதமான அறிவியல் வாய்ப்பை எங்களுக்கு அமைத்து தந்துள்ளது." என்று கூறினார்.



உடனுக்குடனான செய்திகளுக்கு இணைந்திருங்கள்.

Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தைஇங்கே கிளிக்செய்து ஃபாலோ செய்யுங்கள்.. செய்திகளை உடனுக்குடன் பெறுங்கள். Also Follow @ Facebook, Twitter, Instagram, Sharechat,Telegram, YouTube

Published by:Vinothini Aandisamy
First published: