போட்டோ, வீடியோ அனுப்பும் போது எச்சரிக்கை மெசேஜ்... வாட்ஸ்அப் புதிய அப்டேட்

உலக அளவில் வாட்ஸ்அப் செயலியை மிக அதிக அளவில் பயன்படுத்துவதில் இந்தியா முன்னிலையில் உள்ளது. கிட்டத்தட்ட பெரும்பாலான மக்கள் தங்களுடைய அனைத்து விதமான தகவல் தொடர்பு சார்ந்த விஷயங்களுக்கும் வாட்ஸ்அப் செயலியை தான் பயன்படுத்திக்கின்றனர். வாட்ஸ்அப் நிறுவனமும் தங்களுடைய வாடிக்கையாளர்களை திருப்திப்படுத்தும் விதமாக பல்வேறு வசதிகளை சேர்த்து அவ்வப்போது புதிய புதிய அப்டேட்டுகளை அளித்து வருகிறது.

சமீபத்தில் குழுவாக சேர்ந்து கால் பேசும் வசதி, குறிப்பிட்ட ஒருவரை மட்டும் மியூட் செய்து கொள்ளும் வசதி, வாட்ஸ்அப் கம்யூனிட்டிஸ் போன்ற பல்வேறு புதிய வசதிகளுடன் புதிய அப்டேட்டை கொடுத்தது குறிப்பிடத்தக்கது. தற்போது அதுபோலவே புகைப்படங்கள் அல்லது வீடியோக்களை நாம் மற்றவருக்கு அனுப்பும் போது அதில் கேப்ஷனை நாம் சேர்க்கவில்லை எனில், அனுப்புவதற்கு முன்பு உங்களுக்கு ஒரு எச்சரிக்கை அனுப்பப்படும். இதன் காரணமாக நீங்கள் அனுப்பப் போகும் புகைப்படங்கள் மற்றும் வீடியோக்களை பற்றி மிக சரியான தகவல்களை மற்றவருக்கு புரியும் படி சேர்த்து நீங்கள் அனுப்ப முடியும்.

வாட்ஸ்அப்பை பற்றிய தகவல்களை தொடர்ந்து வெளியிட்டு வரும் WABetainfo என்ற வலைதளத்தில் இதைப் பற்றிய செய்தி வெளியாகியுள்ளது. “இந்த வசதிக்காக நன்றி. இனி நீங்கள் ஒரு புகைப்படம் அல்லது வீடியோவை மற்றவருக்கு ஃபார்வர்ட் செய்யும் போது இனி தனியாக கேப்டனை சேர்க்க தேவையில்லை. முன்னரே புகைப்படம் அல்லது வீடியோவை அனுப்பும் போதே அதற்கான கேப்ஷனையும் சேர்ந்து அனுப்ப முடியும். இந்த வசதியானது தற்போது ஐஓஎஸ் இயங்குதளத்தில் இயங்கும் வாட்ஸ் அப் பீட்டா யூஸர்களுக்கு மட்டும் அளிக்கப்பட்டுள்ளது” என்று அந்த வலை பக்கத்தில் குறிப்பிடப்பட்டுள்ளது.

அதில் இணைக்கப்பட்டுள்ள தகவல்களின்படி இனி நீங்கள் கேப்ஷனை சேர்க்காமல் ஏதேனும் புகைப்படங்களையும், வீடியோக்களையும் ஃபார்வேர்டுசெய்ய முற்படும்போது, வாட்ஸ்அப் உங்களுக்கு கேப்ஷன் சேர்க்கவில்லை என்ற எச்சரிக்கையை அனுப்பும். இதன் காரணமாக ஒருவேளை உங்களுக்கு கேப்ஷன் சேர்க்க வேண்டும் எனில் நீங்கள் ஒரு முறை சரி பார்த்துக் கொண்டு அதன் பிறகு செய்யலாம். அதுபோலவே ஒரு வேளை கேப்ஷன் கொண்ட ஃபைலை நீங்கள் ஃபார்வர்ட் செய்யும் போது கேப்ஷன் தேவையில்லை என்று நினைத்தால் அதனை நீக்கவும் செய்யலாம்.

மேலும் மெசேஜ்களுக்கு ரியாக்ட் செய்வதற்கான புதிய வசதியும் சேர்க்கப்பட்டுள்ளது. எமோஜிகளை பயன்படுத்தி உங்களுக்கு அனுப்பப்பட்டுள்ள செய்திகளுக்கு நீங்கள் ரியாக்ட் செய்ய முடியும். ஏற்கனவே இந்த வசதியானது மெட்டா நிறுவனத்தின் இன்ஸ்டாகிராம் மற்றும் ஃபேஸ்புக் போன்ற தளங்களில் பயன்பாட்டில் உள்ளது குறிப்பிடத்தக்கது.