• HOME
  • »
  • NEWS
  • »
  • tamil-nadu
  • »
  • நூல் விலை உயர்வை கண்டித்து இன்று திருப்பூரில் முழு அடைப்பு போராட்டம் : 116 அமைப்புக்கள் ஆதரவு

நூல் விலை உயர்வை கண்டித்து இன்று திருப்பூரில் முழு அடைப்பு போராட்டம் : 116 அமைப்புக்கள் ஆதரவு

நூல் விலை உயர்வு

நூல் விலை உயர்வு

தமிழக அரசு பருத்தி பஞ்சினை நேரடியாக கொள்முதல் செய்து பதுக்கலை தடை செய்ய வேண்டும் உள்ளிட்ட கோரிக்கைகளை வலியுறுத்தி திருப்பூர் ஏற்றுமதியாளர்கள் மற்றும் உற்பத்தியாளர்கள் சங்கம் சார்பில் முழு அடைப்பு போராட்டத்தை அறிவித்துள்ளனர்.

  • Share this:
    நூல் விலை உயர்வை கண்டித்து இன்று  திருப்பூரில் முழு அடைப்பு போராட்டம் நடைபெறுகிறது. இந்த போராட்டத்திற்கு 116 அமைப்புக்கள் ஆதரவு தெரிவித்துள்ளன. காலை 9 மணி முதல் அடையாள உண்ணாவிரத போராட்டமும் நடத்துகின்றனர்.

    திருப்பூர் என்றாலே நினைவுக்கு வருவது பனியன் தான். பனியன் பின்னலாடை ஏற்றுமதியின் மூலம் ஆண்டுக்கு 26 ஆயிரம் கோடி ரூபாய் அன்னிய செலாவணியை ஈட்டித்தரும் நகரமாகவும், உள்நாட்டு உற்பத்தியில்  22 ஆயிரம் கோடி ரூபாய் வர்த்தகம் என ஆண்டுக்கு 48 ஆயிரம் கோடி ரூபாய் வர்த்தகத்தை மேற்கொண்டு இந்தியாவின் பின்னலாடை தலைநகராக விளங்கி வருகிறது.

    திருப்பூரில் உள்ள பனியன் நிறுவனங்களில் நேரடியாகவும் மறைமுகமாகவும் 10 லட்சத்திற்கும் மேற்பட்ட தொழிலாளர்கள் பணியாற்றி வருகின்றனர். இத்தனை சிறப்பு வாய்ந்த வர்த்தக நகர் தற்போது மூலப்பொருளான நூல் விலை உயர்வு காரணமாக கடுமையான பாதிப்பை சந்தித்து வருகிறது. கடந்த ஜனவரி மாதம் முதல் நூல் விலையானது 130 ரூபாய் வரையிலும் உயர்ந்துள்ளது.

    கிலோ 220 ரூபாய்க்கு விற்பனையாகி வந்த நூல் விலை தற்போது 350 ரூபாயை கடந்து விற்பனையாகி வருகிறது. மேலும் முழுபணமும் செலுத்திய பின் முன்பதிவின் மூலம் காத்திருப்பின் அடிப்படையிலேயே நூல் கிடைக்கும் சூழல் ஏற்பட்டுள்ளது. தொடர் விலை உயர்வால் ஏற்றுமதி மற்றும் உள்நாட்டு பின்னலாடை மற்றும் ஜவுளி உற்பத்தி கடுமையாக பாதிக்கப்பட்டுள்ளதுடன் ஏற்றுமதியாளர்கள் பெரும் நஷ்டத்தையும் சந்தித்துள்ளனர்.

    பருத்தி பஞ்சு, நூல் உள்ளிட்ட மூலப்பொருட்களை நேரடியாக ஏற்றுமதி செய்வது மற்றும் பதுக்கல் காரணமாக செயற்கை தட்டுப்பாடு ஏற்படுத்தப்படுவதாகவும், அதன் காரணமாக நூல் விலை உயர்ந்து வருவதாக கூறப்படுகிறது.

    இது போன்ற செயற்கை தட்டுப்பாடு ஏற்படுத்தி நூல் விலையை உயர்த்துவதை கண்டித்தும் மூலப்பொருட்களான பருத்தி மற்றும் நூல் ஏற்றுமதியை தடை செய்ய வேண்டும், தமிழக அரசு பருத்தி பஞ்சினை நேரடியாக கொள்முதல் செய்து பதுக்கலை தடை செய்ய வேண்டும் உள்ளிட்ட கோரிக்கைகளை வலியுறுத்தி திருப்பூர் ஏற்றுமதியாளர்கள் மற்றும் உற்பத்தியாளர்கள் சங்கம் சார்பில் திருப்பூரை சேர்ந்த 116 அமைப்புக்கள் சேர்ந்து இன்று திருப்பூரில் முழு அடைப்பு போராட்டத்தை அறிவித்துள்ளனர்.

    Must Read : புதிய வகை உருமாறிய கொரோனா வைரஸ் : மாநிலங்களுக்கு மத்திய சுகாதார துறை எச்சரிக்கை

    அனைத்து அரசியல் கட்சிகள் மற்றும் வர்த்தக அமைப்புகளும் இணைந்து அறிவித்துள்ளதால் கடை அடைப்பு போராட்டம் பெரிய அளவில் வெற்றி பெரும் என்று கூறப்படுகிறது. காலை 9 மணி முதல் ஏற்றுமதியாளர்கள் மற்றும் பனியன் உற்பத்தியாளர்கள் திருப்பூர் மாநகராட்சி அலுவலகம் முன்பாக உண்ணாவிரத போராட்டத்திலும் ஈடுபடுகின்றனர்.

    செய்தியாளர் : பாலாஜி பாஸ்கர், திருப்பூர்.

    Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தைஇங்கே கிளிக்செய்து ஃபாலோ செய்யுங்கள்.. செய்திகளை உடனுக்குடன் பெறுங்கள். Also Follow @ Facebook, Twitter, Instagram, Sharechat,Telegram, YouTube

    Published by:Suresh V
    First published: