கூடங்குளத்தில் 5,6-வது அணுஉலைகள்: எதிர்ப்பு தெரிவித்து அமைச்சர்களிடம் சுப.உதயகுமார் மனு

அமைச்சரிடம் னு அளிக்கும் சுப.உதயகுமார்

திருநெல்வேலி மாவட்டம் கூடங்குளத்தில் ஐந்தாவது மற்றும் ஆறாவது அணு உலைகள் அமைக்கப்படுவதற்கு சுப.உதயகுமார் எதிர்ப்பு தெரிவித்துள்ளார்.

  • Share this:
திருநெல்வேலி மாவட்டம் கூடங்குளத்தில் ஐந்தாவது ஆறாவது அணு உலைகளுக்கு முதலாவது கான்கிரீட் அமைக்கும் பணி துவங்கியுள்ளது. அடுத்த ஆறு வருடங்களில் இரண்டு அணு உலைகளும் செயல்பட துவங்கும் என அறிவிக்கப்பட்டுள்ளது. இதன் மூலம் தமிழகத்திற்கு மேலும் 1,000 மெகாவாட் மின்சாரம் கிடைக்கும். இந்த நிலையில் அணுக்கழிவு மையம், அணு உலை பூங்கா அமைப்பதற்கு அணு உலைக்கு எதிரான கூட்டமைப்பினர் எதிர்ப்பு தெரிவித்து வருகின்றனர். 40 ஆண்டு கால எதிர்காலத்திற்காக 400 ஆண்டுகால சந்ததிகளை பலி கொடுக்க வேண்டுமா என கேள்வி எழுப்புகின்றனர்.

திருநெல்வேலி மாவட்டம் கூடங்குளத்தில் தலா ஆயிரம் மெகாவாட் திறனுடைய இரண்டு அணு உலைகள் கடந்த 2014 மற்றும் 16 ஆம் ஆண்டுகள் முதல் செயல்பட்டு வருகிறது. முதலாவது அணு உலை 2014ஆம் ஆண்டு முதல் வணிக ரீதியிலான மின் உற்பத்தி செய்துவரும் நிலையில் இரண்டாவது அணு உலையில் 2016 ஆம் ஆண்டு முதல் மின் உற்பத்தி செய்யப்பட்டு வருகிறது. தமிழகத்தின் இந்த இரண்டு அணு உலைகளில் இருந்து தலா 562 மெகாவாட் கிடைக்கிறது.

சுப.உதயகுமார்


 

தற்போது முதலாவது அணு உலை எரிபொருள் நிரப்பும் பணிகள் மற்றும் பராமரிப்பு பணிகளுக்காக நிறுத்தப்பட்டுள்ளது. இரண்டாவது அணு உலையில் மட்டும் மின்சாரம் உற்பத்தி செய்யப்பட்டு வருகிறது. மூன்றாவது, நான்காவது அணு உலைகள் அமைக்கும் பணி கடந்த 2017 ஆம் ஆண்டு துவங்கியது. 39 ஆயிரம் கோடி மதிப்பீட்டில் தொடங்கப்பட்டுள்ள இந்த திட்டத்தில் 50 சதவீத பணிகள் நிறைவடைந்துள்ளன தெரிவிக்கப்பட்டுள்ளது.  2023 ஆம் ஆண்டுக்குள் பணிகள் நிறைவடைந்து மின் உற்பத்தி தொடங்கும் என அறிவிக்கப்பட்டிருந்த நிலையில் வெளிமாநில தொழிலாளர்கள் சொந்த ஊர் திரும்பியதால் பணிகளில் சுணக்கம் ஏற்பட்டுள்ளது.

இதன் காரணமாக மேலும் இரண்டு ஆண்டுகள் ஆகலாம் என தெரிகிறது. இதனிடையே அணுமின் நிலைய வளாகத்தில் ஐந்தாவது மற்றும் ஆறாவது அணு உலைகள் அமைக்கும் பணிக்கான அடித்தளத்தில் முதலாவது கான்கிரீட் அமைக்கும் பணி இன்று தொடங்கியுள்ளது. 49,621 கோடி  மதிப்பீட்டில் இந்திய- ரஷ்ய கூட்டு தொழில் நுட்பத்தில் இந்த அணி உலைகள் அமைகிறது.

2026ம் ஆண்டு 5வது அணு உலையும் 2027 ம் ஆண்டு 6வது அணு உலையும் பயன்பாட்டிற்கு வரும் என அறிவிக்கப்பட்டு உள்ளது. இந்திய அணுசக்தி துறை அரசு செயலாளர் கே.என். விகாஸ் மற்றும் அணுசக்தி கழக தலைவர் சர்மா ரஷ்ய அணுசக்தி கழகத்தின் தலைவர் துணை தலைவர் ஆகியோர் வீடியோ கான்பிரன்ஸ் மூலம் பணியை தொடங்கினர். வளாக இயக்குனர் காட்பிளே உள்ளிட்ட அதிகாரிகள் நேரில் கலந்து கொண்டனர்.

ஆயிரம் மெகாவாட் திறனுடைய  2 அணு உலைகள் பயன்பாட்டில் உள்ள நிலையில் இதன் மூலம்  தமிழகத்திற்கு 1,124 மெகாவாட் மின்சாரம் கிடைக்கிறது. மேலும் 4 அணு உலைகள் அமைவதால் கூடுதலாக 2 ஆயிரம் மெகாவாட் மின்சாரம் கிடைக்க வாய்ப்பு ஏற்பட்டு உள்ளது. அதோடு வேலை வாய்ப்புகளும் அதிகரிக்கும் சி, மற்றும் D பிரிவில் உள்ளூர் மக்களுக்கு வேலை கிடைக்கும் நிலை உள்ளது.

இதனிடையே தொடர்ச்சியாக அணு உலைகளின் எண்ணிக்கையை அதிகரிப்பதற்கு அணுஉலைக்கு எதிரான மக்கள் இயக்கத்தினர் எதிர்ப்பு தெரிவித்துள்ளனர். முதலாவது மற்றும் இரண்டாவது அணு உலைகள் பயன்பாட்டிற்கு வரும் நேரத்தில் இரண்டரை ஆண்டுகள் கூடங்குளம் சுற்று வட்டார கிராமங்களில் தொடர்ந்து பல்வேறு போராட்டங்கள் நடத்தி வந்தனர். அவர்களுக்கு தேவையான அடிப்படை வசதிகளை மேம்படுத்தவும் கோரிக்கைவைத்தனர்.  அவர்களின் கோரிக்கையை ஏற்று சுற்றுவட்டார கிராமங்களில் அடிப்படை வசதிகள் ஓரளவு மேம்படுத்தப்பட்டுள்ளது.

எனினும் தொடர்ச்சியாக அணுஉலை அமைக்கும் நடவடிக்கைகள் நிறுத்தப்படவில்லை. 2017 ஆம் ஆண்டு மூன்றாவது நான்காவது நிலைகள் 21 ஆம் ஆண்டு ஐந்தாவது, ஆறாவது அலுவலர்கள் என எண்ணிக்கை அதிகரித்து வருகிறது. அதோடு அணுகழிவு மையம் அமைக்கப்படவுள்ளதாகவும் தெரிய வருகிறது.

இதற்கு எதிர்ப்பு தெரிவித்து சு.ப.உதயகுமார் தலைமையிலான எதிர்ப்புக் குழுவினர் அமைச்சர்கள் அனிதா ராதாகிருஷ்ணன் கீதாஜீவன் ஆகியோரை நேரில் சந்தித்து மனு அளித்தனர். அதோடு தமிழக சட்டமன்ற சபாநாயகர் கூடங்குளம் அணு உலை அமைந்துள்ள ராதாபுரம் சட்டப்பேரவைத் தொகுதியின் உறுப்பினருமான அப்பாவுவை நேரில் சந்தித்து புதிய அணு உலைகள் அமைவதை தடுக்க வலியுறுத்தி மனு அளித்தனர்.

பின்னர் செய்தியாளர்களிடம் பேசிய சுப உதயகுமார், ‘அணு உலைகள் அமைப்பதன் மூலம் 40 ஆண்டுகளுக்கு மின்சாரம் கிடைக்கும். அணுக்கழிவுகளை அகற்ற போராட வேண்டியிருக்கும். 40 ஆண்டு கால எதிர்காலத்திற்காக 400 ஆண்டு கால எதிர்காலத்தை வீணாக்கும் செயல். நாங்கள் வளர்ச்சிக்கு எதிரானவர்கள் அல்ல. பராமரிப்பு பணிகள் ஆண்டிற்கு ஒருமுறை மட்டுமே நடக்க வேண்டுமானால் முதலாவது மற்றும் இரண்டாவது அணு உலையில் பலமுறை நடக்கிறது.
Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தை இங்கே கிளிக் செய்து ஃபாலோ செய்யுங்கள்.. செய்திகளை உடனுக்குடன் பெறுங்கள்.

இரண்டாவது அணு உலை கடந்த மே மாதம் மட்டும் மூன்று முறை கோளாறு ஏற்பட்டு மின் உற்பத்தி நிறுத்தப்பட்டது. இந்த அணு உலைகள் தரமற்றவை. பாதுகாப்பற்றவை. அதோடு அணு கழிவுகளை இங்கேயே புதைக்கும் திட்டத்தையும் செயல்படுத்த அணுசக்தி துறை முயற்சிக்கிறது. உலகம் முழுவதும் அணு உலை பூங்காக்கள் அமைப்பதை நிறுத்தி வருகிறது. புகுசிமா அணு கழிவுகளை அகற்ற ஜப்பான் தத்தளித்து வருகிறது. இந்த நிலையில் ஒரே இடத்தில் பல அணு உலைகள் அமைப்பதை ஒருபோதும் அனுமதிக்க முடியாது. தமிழக முதலமைச்சரை நேரில் சந்தித்து மனுஅளிக்க உள்ளோம். அதன் முதற்கட்டமாக தென் தமிழகத்தை சேர்ந்த அமைச்சர்களை நேரில் சந்தித்து இது தொடர்பாக மனு அளித்துள்ளோம் என்று தெரிவித்தார்.
Published by:Karthick S
First published: