அதிர்ச்சி சம்பவம்: ஆபாசப்படம் பார்த்து 11 வயது சிறுமியை பலாத்காரம் செய்த பள்ளிச் சிறுவர்கள்

மாதிரிப்படம்

கோவை சுந்தராபுரத்தில் 11 வயது சிறுமியை பாலியல் பலாத்காரம்  செய்ததாக பள்ளி மாணவர்கள் இருவரை காவல் துறையினர் கைது செய்து சிறுவர் சீர்திருத்தப் பள்ளியில் அடைத்தனர். தலைமறைவான ஒரு மாணவரைத் தேடி வருகின்றனர்.

  • Share this:
கோவை சுந்தராபுரம்  பகுதியில் தாயை இழந்த 11 வயது சிறுமி தந்தை மற்றும் அத்தையின் அரவணைப்பில் ஒரு வாடகை வீட்டில் வளர்ந்து வருகிறார். தந்தையும் அத்தையும் கூலி வேலைக்குச் செல்லும் நிலையில், வீட்டில் தனியாக இருக்கும் சிறுமி, கீழ் வீட்டில் டி.வி பார்க்கச் செல்வது வழக்கம்.  கீழ் வீட்டில் இருக்கும் 10ம் வகுப்புப் படிக்கும் சிறுவனின் பெற்றோரும் வேலைக்குச் செல்லும் நிலையில், சிறுவன் மட்டும் வீட்டில் இருந்து வந்துள்ளார்.

ஆன்லைன் வகுப்பிற்காக சிறுவனின் பெற்றோர் அவருக்கு ஸ்மார்ட் போன் வாங்கிக் கொடுத்துள்ளனர். அதில் ஆபாசப் படங்களை சிறுவன் பார்த்து வந்துள்ளார். மேலும், 11ம் வகுப்புப் படிக்கும் இன்னொரு சிறுவனையும் வீட்டிற்கு வரவழைத்து இருவரும் ஆபாசப் படங்களைப் பார்த்துள்ளனர். இந்நிலையில், கடந்த மே 20ம்  தேதி டி.வி பார்க்க வந்த சிறுமியை கட்டாயப்படுத்தி ஆபாசக் காட்சிகளைப் பார்க்க வைத்து பாலியல் பலாத்காரம் செய்துள்ளனர்.

இந்தச் சம்பவம் தொடர்ந்து வந்த நிலையில் மேலும் ஒரு 11ம் வகுப்பு படிக்கும்  சிறுவனையும் அழைத்து, மூவரும் சேர்ந்து சிறுமியை தொடர்ந்து பாலியல் பலாத்காரம் செய்துள்ளார். 11 வயது சிறுமிக்கு திடீரென உடல்நலக்குறைவு ஏற்பட்டதால் அவரை அரசு மருத்துவமனைக்கு தந்தையும், அத்தையும் அழைத்துச் சென்றனர்.


அவரைப் பரிசோதித்தபோது சிறுமி தொடர்ந்து  பாலியல் துன்புறுத்தல் செய்யப்பட்டிருப்பது மருத்துவப் பரிசோதனையில் தெரியவந்தது. இதனையடுத்து இது குறித்து மருத்துவர்கள் சிறுமியிடம் விசாரித்தபோது , சிறுமி நடந்த சம்பவங்களைத் தெரிவித்துள்ளார். இதனையடுத்து மருத்துவர்கள் காவல்துறைக்குத் தகவல் தெரிவித்தனர்.

சிறுமியிடம்  புகார் பெற்ற கோவை கிழக்கு அனைத்து மகளிர் காவல் துறையினர் போக்சோ சட்டத்தின் கீழ் 3 பள்ளி மாணவர்கள் மீதும் வழக்குப் பதிவு செய்தனர். அதில் 2 பள்ளி மாணவர்களைக் கைது செய்து சிறுவர் சீர்திருத்தப் பள்ளியில் அடைத்தனர். தலைமறைவாக இருக்கும் மற்றொரு பள்ளி மாணவரை மகளிர் போலீசார் தேடி வருகின்றனர். ஆன்லைன் வகுப்புக்காக பெற்றோர் வாங்கிக் கொடுத்த ஸ்மார்ட் போன் அவர்களுக்கே வினையாக  முடிந்துள்ளது சக பெற்றோர் மத்தியில் அதிர்ச்சியை ஏற்படுத்தியுள்ளது.
Published by:Rizwan
First published: