ஈரோடு கிழக்குத் தொகுதி இடைத்தேர்தல் : முதல்வர் ஸ்டாலின் பிரச்சாரத்தில் திடீர் மாற்றம்!

ஈரோடு கிழக்குத் தொகுதியில் காங்கிரஸ் வேட்பாளர் ஈ.வி.கே.எஸ். இளங்கோவனுக்கு ஆதரவாக முதலமைச்சர் மு.க.ஸ்டாலின் பரப்புரை மேற்கொள்ளவார் என அறிவிக்கப்பட்டநிலையில், தற்போது அந்த பரப்புரையில் மாற்றம் செய்யப்பட்டுள்ளது.

ஈரோடு கிழக்குத் தொகுதியில் முதலமைச்சர் மு.க. ஸ்டாலின் 2 நாட்கள் பரப்புரை செய்ய முதலில் நிகழ்ச்சி நிரல் தயாரிக்கப்பட்டு இருந்தது.

இந்நிலையில், முதலமைச்சர் சுற்றுப்பயணத்தில் மாற்றம் செய்யப்பட்டுள்ளது. அதில் நாளை ஒரு நாள் மட்டும் முதலமைச்சர் மு.க.ஸ்டாலின் பரப்புரை மேற்கொள்வார் என்று அறிவிக்கப்பட்டுள்ளது.

சென்னையில் இருந்து இன்று மாலை விமானம் மூலம் கோவை செல்லும் முதலமைச்சர் மு.க. ஸ்டாலின் அங்கிருந்து கார் மூலம் ஈரோடு செல்கிறார். சக்தி சுகர்ஸ் விருந்தினர் மாளிகையில் தங்கும் அவர், அங்கு தி.மு.க. நிர்வாகிகள் மற்றும் தொகுதியின் பொறுப்பு அமைச்சர்களை சந்தித்து தொகுதி நிலவரங்களை கேட்டறிகிறார்.

நாளை காலை காங்கிரஸ் வேட்பாளர் ஈ.வி.கே.எஸ். இளங்கோவனுக்கு ஆதரவாக முதலமைச்சர் மு.க.ஸ்டாலின் வீதி வீதியாக பரப்புரை மேற்கொள்கிறார்.

அதன்படி காலை 9 மணிக்கு சம்பத் நகர் பகுதியிலும், காலை 10 மணிக்கு காந்தி சிலை பகுதியிலும் பரப்புரை செய்யும் முதலமைச்சர், காலை 11 மணிக்கு அக்ரஹாரம் பகுதியில் பரப்புரை மேற்கொள்ள உள்ளார்.

மாலை 3 மணிக்கு முனிசிபல் காலனி பகுதியில் பரப்புரை மேற்கொள்ளும் முதலமைச்சர், மாலை 3.45 மணிக்கு பெரியார் நகர் பகுதியில் பரப்புரை செய்கிறார். அதன் பிறகு சக்தி சுகர்ஸ் சென்றுவிட்டு கோவை வழியாக முதலமைச்சர் மு.க.ஸ்டாலின் சென்னை திரும்புகிறார்.